Kumin Balon d’Or dawng tura awmkhai tak ni chunga a dawn tak loh avanga a behchhan club pawhin kan hnung lawk Balon d’Or sem inkhawm pawh an boycott phah hialna Vinicus Junior chuan Inrinni zanah goal thum khungin Osasuna lakah sili faiin Real Madrid a chakpui.
Santiago Bernabeu stadium-a mipui 72,462 tehreng pungkhawm hmaah Brazilian mihang a langsar ber a; tun kha bik laka La Liga hat-trick vawihnih a siamna a ni ta.
Inkhelh banah Vinicius-a lansarhna hliahtu thil thleng duhawm lo lam awmin, darkar chanve an khelh tlin ruala zawnchhuah ngai khawpa inhliam Eder Militao khup na kha endik a nih hnuah footballer vanduaite’n hun rei tak an bawksawppui thin khup ruh chhunga tha thler/chat (anterior cruciate ligament injury) an tih ang kha a ni tih nemngheh a ni.
Brazilian centre-back hian a khup dinglam a tihnat rualin khelmual chhuatah a vial ngawlh ngawlh a, hlang hmanga zawnchhuah a nih hnuah kum 21 leka upa Raul Asencio chuan a rawn thlak a, Militao inhliam kha Real debut a nghahchhuah phahna a ni zui ta a ni.
Real Madrid manager Carlo Ancelotti chuan first half chhunga inhliam pathum ngawt mai a nei kha thil vang tak a nih thu sawi chungin squad-a fit player an kiam zel chuan player-te’n chawlhhahdamna hun an nei tam tawk dawn lo a, inhliam theihna risk a sang zel dawn tih a sawi.
Eder Militao bakah forward Rodrygo pawh tan atanga minute 20-na lekah hliam avangin thlak a ni a; chawlhlawk zawhah Lucas Vazquez pawhin a khelh chhunzawm thei lo!
Thla hmasa mai khan right-back Dani Carvajal pawh ‘anterior cruciate ligament injury’ avang bawkin a lo bawksawp tawh a; centre-back David Alaba pawh khup hliam avangin a la chawl mek a, Real tlarhnung harsatna tawh hi a namen lo hle niin a lang.
Real Madrid hi an khelmual hman thiamah ngei a zawnin Barcelona leh AC Milan lakah an tlawm a, kha kha kum thum chhunga home match-a an tlawm zawn vawikhatna niin, Pathianni zan khan an khelmuala chak an mamawhna a sang zual hle.
Goal thun thuai thuai an mamawh laiin darkar chanveah pawh an la hlawhtling zo lo a, mahse, minute 34-ah Vinicius chuan Jude Bellingham siamsak atangin goal hmahruai a thun a, chawlhlawk hma minute thum la awmah England international Bellingham chuan Raul Asencio long ball chhawpsak atangin mualneitu team goal hnihna a thawh ve leh a, hei hi tun season-a a goal khatna a ni!
Second half tir lam leh laihawl thlen dawnah Brazilian forward Vinicius chuan Osasuna goalkeeper Sergio Herrera dawn zawh loh goal hnih dang khungbelhin, an kawtkaiah Spanish giants-in hnehna nuamsa an chang.
Game 12-a goal riat ngah tawh Vinicius hian La Liga top-scorer race-ah pahnihna luah mekin, goal khung hnem ber ni mek Barcelona forward Robert Lewandowski lakah goal rukin a hniam.
An point thum an hlawhchhuah hmangin table-a pahnihna luahtu Real Madrid hian hmahruaitu Barcelona nena an inthlauhna chu point rukah an pawtzim a, nizan result tarlan hman lohah Hansi Flick-a team Barca hian Real Sociedad muala hnehna an chan chuan a hma ang chiahin La Liga champion nena an inkar an pawtzau leh dawn a ni.
Real hian point 27 nei tling chiahin, point 21 nen Osasuna-in table-ah pangana an luah thung.
Vinicius ‘hat-trick’ hmanga chak nuamsa Real
