Vitamin D hi ruh hrisel nan te, kan taksain natna a do theihna tihchak nan te, kan mood a lo fuh zawk theih nan te a pawimawh miau a, kan taksa hriselna leh nun nawm theih nan a pawimawh hle a ni. Ei leh in atanga kan lak luh bakah, Vitamin D kan hmuh theihna awlsam ber chu ni êng (sunlight) atangin a ni a, chuvangin nilum ai tam a pawimawh a nia! Mahse, Vitamin D tlachham hi kan tam khawp mai a, a tam zawk chuan kan tlachham tihpawh kan inhre kher lo ang. Vitamin D kan tlakchhamna chhan chu kan ei leh in fuh tawk lo bakah khawlaia kan chhuak vak tam lo lutuk te pawh a ni thei. Vitamin D tlakchham hian kan lo nguai a, kan mood te a lo fuh loin, rilru hnual riau te pawh a neih theih a, chutiang mai piah lamah natna serious zawk leh nuna atan pawh a pawi thei thlengin a thlen thei. Tun tumah hian Vitamin D tlakchham avanga natna serious zawk thleng thei ni a Times of India-in a tarlan te kan rawn chhuah chhawng e.
- Osteoporosis: Vitamin D chuan kan taksain calcium a hip luh zung zung theih nan a pui a, chu chu ruh tihchak nan a pawimawh hle. Chuvangin, Vitamin D kan tlakchham chuan kan ruh a lo chak tawh lo a, ruh lam natna, ruh mawih an tih mai, osteoporosis a thlen thei a, eng emaw hlekah ruh tliak te pawh a awm hma duh bik, a bikin kum upa lamah.
- Type 2 diabetes: Insulin sensitivity siamthatu pawimawh tak a ni a, chuvangin Vit. D kan tlakchham chuan glucose metabolism a tibuai thei a, chu chuan type 2 diabetes neihna theihna risk a tisang thei.
- Depression: Vitamin D hian kan thluak a serotonin level a tidanglam thei a, chu chuan kan mood zawng zawng a nghawng thei. Depression nei te hian Vitamin D an tlachham deuh châwk reng a ni. The British Journal of Psychiatry a zirchianna an tihchhuahah chuan Vitamin D tlachham te tan chuan depression neih mai a awlsam bik niin an tarlang.
- Autoimmune diseases: Vit. D hian kan immune system a tanpui a, kan tlakchham chuan- multiple sclerosis (MS) leh rheumatoid arthritis (RA) te a tichhuak thei. 2023-a zirchianna pakhat ‘Vitamin D and Autoimmune Rheumatic Diseases’ tihah chuan Vit. D tlakchham hi autoimmune disease- rheumatoid arthritis leh Systemic Lupus Erythematosus (SLE) te nen a inzawm thei niin an tarlang.
- Cancer: Vitamin D tlakchhamna hian cancer thenkhat a thlen thei a, eng colorectal, hnute leh prostrate te hi a ni lehzual. Chutihrualin kan taksa mamawh ang Vitamin D kan neih chuan cancer thenkhat risk a tihniam thei ve leh bawk. 2015-a zirchianna ‘Vitamin D for Prevention and Treatment of Colorectal Cancer: What is the Evidence?’ tihah chuan Vitamin D chu cancer venna leh a enkawlna atana thatna nei niin an tarlang.