Nikum tunkar angah hian President Vladimir Putin chuan Kursk region tlawhin World War II laia Soviet army te hlawhtlinna turu ber pakhat cham 80-na lawmna neihah dawhsanah a ding a.
Mipui pungkhawm Ukraine beihnaa tel te pawh awmnaah thusawiin Putin chuan Battle of Kursk kha ‘kan mitena hnehna an chan ropui ber pakhat’ tiin a sawi.
Tunah erawh kum 1943 battle 81st anniversary lawmna puahchahnaah Kursk chuan chanchinthar neiin mahse a danglam hle tawh thung.
August 6 khan Ukrainian forces te chuan Kursk region run tanin thingtlang khuate lain lung in tang za tel khalhkhawm bawkin civilian sang tam takte chuan an chenna an chhuahsan phah a. Russia chu a barakhaih hle a, a beisei loh angin Ukraine chuan chet a la a ni.
Putin erawh harsatna tamtak a tawh tawhah ti thut ngai lo leh muangchanga chhanglet chi a ni a, tunah pawh Ukraine chetlak dan chu a namnul zawng hlirin a la sawi char char bawk.
Kursk chungchang August 12-a security staff te nena meeting an neihnaah a lawm chiah lo tia sawi niin President Putin chuan Kursk region a Ukraine te chet dan chu ‘inrunluihna’ tiin a sawi zui a ni.
State media-te pawhin chet la nghalin Kursk a thil thleng chu humanitarian disaster lam hawi zawnga chhuahin World War II hnua Russia-in beihna a tawh lian ber tilam hawi zawngin an puang reng reng lo bawk.
Kum 24 chhung thuneihna a chan tawhah Putin chuan amah chauh chu Russia security leh stability pe theiah inchhuah thin a ni a, mahe, Ukraine indona thlen hnuah a image a chhe ta hle thung.
Russian khawpui te chu Kyiv forces ten missile leh drone in an bei chamchi tawh a. Nikum khan Mercenary chief Yevgeny Prigozhin chuan military leadership namthlak tumin helna a chawkchhuak zuai hman bawk a. March thla khan silai keng chuan Moscow concert hall luhchhuahin mi 145 in nunna an chan phah bawk.
Chutih laiin Krelin chuan Defense Ministry official te siksawi hnathawkin tam tak te chu eiruk thubuai a siamsak a. Lower-level official te chu man niin fraud charges a siamsak zingah airborn brigade commander chawimawina tam tak dawng tawh Lt. Col. Konstantin Frolov pawh telin, Moscow police station a handcuff chunga an hruai laiian, “He ta awm ai chuan Kursk-a awm ka thlang zawk maw le,” a tihial a ni.
Russia-ah zan khat thil thuah thil a inthlak buai thei tia sawi thin a ni a, thuneitute chuan official thahnem tak te lakah criminal case siamin Russia mihausa ber ber te ram chu sorkar in a chhuhsak bawk a.
State TV te chuan Kursk-ah Ukraine an che na hle chungin Putin an thlawpna an aupui chamchi chungin Russia a mi pawimawh chungchuanga ngaih Russia elite te ngaihdan erawh hriatfiah theih a ni lo.
Russia elite te chu Putin-a innghahna tia sawi an ni tiin Ekaterina Schulmann, nonresident scholar, Carnegie Russia Eurasia Center, Berlin chaun a sawi a. “Thil thleng mek chu an tana tha tur a nih leh nih loh 24/7 an ngaihtuah ang,” tiin a sawi.
Indona chhuah hnuah heng elites – Putin inner circle, top bureaucrats, security leh military officials leh business leaders te nun chu tha aiin chhia lamin a kal a. Indona avangin tam tak te chu an hausak phah zawk chungin an sum khawhralna tur hmun an nei mang lo a chhan chu khawthlang ram ten an hrek tlat vang a ni.
Heng Russia elite tena zawhna an neih chu ‘Putin chu asset a la ni reng nge liability a ni tawh zawk tih a ni’ tiin Schulmann chuan a sawi.
Russia elite te chu lungawi takin an awm lo mek tiin Nigel Gould-Dvies, senior fellow, International Institute for Strategic Studies, London chuan a sawi a. Status quo ah an lawm lo va, chutihrualin leadership inchuh awm se tu nge chak ang tihah hlauhthawnna an nei a ni a ti bawk.
Putin chet dan tur erawh sawi lawk theih a ni lo. June 2023 a Wagner chief Prigozhin an helna a chawh chhuah khan, rei lo teah tawp maiin Prigozhin chu zalen taka awm tir zui a ni a. Mahse, a zalen rei lo hle, mak tak maiin a private plane chu chesualin a thi mai a ni.
Tunah pawh Kursk a Ukraine-in hmasawnna a nei chungin Putin chuan Azerbaijan tlawhin a zinsan a, Kursk chungchang sawi a nei duh zui der lo. Chutak chu engtiang takin nge phuba lakna a kalpui ang tih inrinsiakna thlentu a ni thung.
Ukraine indonain a awhrei poh leh Russiaah military leh political challenge a nasa dawn thung a, chu chu Putin chuan a hai hauh lo bawk. Kursk region-ah hian military conscript te a tirlut dawn nge, Donbas region a sipai te lachhuak thenin a tirlut zawk dawn tih inrinsiak mek a ni bawk.
Russia chuan chiang takin manpower-ah tlakchham nasa tak a nei a, sipaia tang tur a mamawh a ni, chuvangin misual lung in tang te pawh raldoin a tir mai bawk.
Kursk region indonaah thawh hnihna a thleng ngei dawna ngaih niin Kursk indona chu thil thlak danglam vek thei a nihna pawh a awm dawn tiin Schulmann chuan a sawi a. Putin chet lak dan tur chu hriat lawk theih ni si lova nghah leh inrinsiak a ni mai rih tiin a sawi bawk.
Vladimir Putin-an ngawih chuh?
