Vohbik naupang thattu an
venga lut leh chhuahtir leh
Mamit Chhimveng vohbik naupang thattu chu an khawtlangin an vengchhung rap tawh lo tura an tih hnu ah, a luh leh avangin an chhuahsan tir a, a rap lut leh a nih chuan na taka hma lak an tum tih an sawi.
Mamit Chhimveng Village Council leh All NGO thuchhuah danin, 2023 August 17 zan khan vohbik naupang Lalremruata (11) s/o Lalvulmawii, Mamit Chhimveng chu rawng taka thah a ni a. Pawikhawihtu hi R Lalrinchhana, High School Veng Mamit nia sawi a ni. He thil thlen lai hian R Lalrinchhana hi Mamit Chhim Vengah a khawsa a, hetihlai hian kum 21 mi a ni.
Lalremruata hi 2023 August 18 atangin a chin hriat a ni loa, August 23 chhunah thia hmuh a ni. Rinhlelh thilah R Lalrinchhana hi police-in an la a, August 25-ah a thah a nih thu a inpuang. Mamit Chhimvenga a thawhna automobile workshop-ah a thawk a, August 17 khan Lalremruata nen hian workshop-ah hian an riak dun a, a zuruiin a rek hlum ta mai niin a insawi. August 18 zan dar 11.00 velah Mamit Playground bulah saruakin a ruang hi a dah a, saruaka a dah chhan hi miin tunge a nih an hriat theih lohna tura ti niin a sawi
R Lalrinchhana hi August 25 tlaiah police hmaah a inpuang a, hemi tlai la la hian Central Jail Aizawlah thawn nghal a ni.
2023 August 29 khan Mamit Chhimveng VC leh All NGO huaihawtin khawtlangin kawng an zawh a. Resolution an pass zingah R Lalrinchhana hi an veng huamchhung rap tawh lo turin an ti a. Tual a thah chhan a sawiah an lungawi tawk loa, chiang zawka hriat theihnan leh thurualpui a neih ngei an rin avangin thuneituten chhuichhuak se, tualthattu hi a na thei ang bera hrem nise, tih te a ni.
Hetihlai hian R Lalrinchhana hi tunhnaiah jail atangin a chhuak a, Mamit Chhimvenga a awmnaah zalen takin a rawn lut leh tih khawtlang hruaitute hian sawiin, Inrinni khan Mamit Chhimveng chhuahsan nghal turin an hriattir a. Tun hnuah Mamit Chhimveng leilung a rawn rap leh tih hriat a nih chuan a chungah leh a chhungte chungah eng pawh thleng se, an cho chhuah a ni dawn tih an sawi a ni.
Vohbik naupang thattu an venga lut leh chhuahtir leh
