Samagra Shiksha Lawngtlai District bultumin vohbik naupang (children with special needs) tana anmahni puitu tur hmanrua ‘aids & appliances’ chu Nilaini khan Lawngtlaiah sem a ni a. Lawngtlai East bialtu MLA, adviser to chief minister Dr Lorrain Lalpekliana Chinzah chuan a hmanpui.
Adviser to CM chuan bvohbik naupangte enkawl kawngah fimkhur a ngai hle, tiin, an rilru puthmang hre tur leh tha taka enkawl thei turin zirtirtute chu mahni inchhiar zau turin a chah. Vohbik an nihna hriattir lutuk zawnga kalpui chu thil tha ni loa a hriat thu sawiin, naupang dangte nen angkhat renga enkawl a tul rualin, a bik taka enkawl an ngaihna lai leh tanpui an ngaihna hriatthiam pui erawh a tul hle tih a sawi. Nu leh pate zingah vohbik enkawl lai neite dinhmun a hriatthiampui tih sawiin, an fate enkawl kawngah mahni chauha thawk mai loa, hetiang lama thiamna bik neite rawn thin turin a ngen. Vohbik an enkawl kawngah phurrita la lo tur leh an tan sawrkar a awm reng tih hre tura a duh thu a sawi bawk.
Vohbik naupangte hi an mamawh ang zelin, wheelchair 11, crutch 2, tarmit 90, beng dar 1 leh knee guard 2 hlan an ni.
Samagra Shiksha Lawngtlai hian Lawngtlai district-a block pali ah Children with Special Needs zawn chhuah hna kalpui thin niin, naupang mamawh bik neite enkawl thiam turin zirtirtute hnenah ‘training’ pawh pek thin a ni tih sawi a ni. Vohbik naupang zinga ‘talent’ haichhuah kawngah Samagra Shiksha chuan tanpui ngai zual leh mibik hnenah ‘stipend’ pek thin a ni bawk.
Vohbik naupangte mamawh hlan
