Mizoram Volleyball Association chuan a vawikhatna’n service competition a buatsaih a, pro division mipa player a duh apiang tel theih niin, Zirtawpni zanah mi paruk an intihsiak a, pakhatna chu Chhinga Veng Spikers chhuantawlawl Lalneihpuia a ni.
Neihpuia service nat zawng hi lo tehchhuah niin, darkar khata kilometre 80.5 zeta chakin a service a; lawmman tangkafai Rs. 5,000 leh Nivia ball a dawng.
Pahnihna C. Lalhriatpuia (Hunthar) service nat zawng chu 77.2 kmph niin, Rs 2,000 leh Nivia ball hlan a ni.
Anni pahnih bakah hian consolation prize atana Nivia ball dawng mi pathum awmin, chu’ngte chu:- Lalramhluna of Chhinga Veng Spikers (72.4 kmph), Fabian Lallunghnema of Hunthar (70.8 kmph), Vanlalthlamuanpuia of Hlimen (70.8 kmph).
LPS Arena, Falkland-a Volleyball Service Competition zawh fel taka an tehna pui ber chu service nat zawng leh dik dan (accurate) niin, he inelna hi Mizoram Volleyball Association-in a vawikhat buatsaihna a nih miau avangin Zirtawpni zana tithaber hming kha Mizoram volleyball history-ah a chuang ve reng tawh dawn a ni.
Tarlan tawh angin, he service competition hi Mizorama volleyball thiam bik a duh duh tel theihna a ni a, team hminga inelna ni loin mimala hming pekluh ngai chi a ni a, player huaisen leh theihna nei tan lo chuan tel ngam na chi niin a lang lo.
Player tinin vawithum theuh service chance an neihah vawihnih tal an service dik ngei ngei a ngai a, an service atanga ball kal chak zawng (speed) tha ber chu chhiar a ni.
Volleyball Service Competition
