Election Commission of India (ECI)-in Mizoram tlawmngai pawlte’n inthlan vote chhiar hun sawn tura an ngenna chu ngaihtuah an tum a, member kima an lo sawiho tur thu an sawi. Thawhlehni tlai dar 3 khan vote chhiar hun sawn tura ngentu NGO Coordination Committee te’n ECI hotute hi ECI office-ah an hmu a, ECI lamah hian chief election commissioner leh election commissioner pakhat an tel. senior deputy election commissioner leh deputy election commissioner an tel bawk. Election commissioner dang pakhat a tel lo a, Mizoram tlawmngai pawlte ngenna chu member kima an lo ngaihtuah tur thuin an lo chhang a ni.
NGO Coordination Committee hruaitute sawi danin, darkar chanve tling lo deuh an inkawm a, ECI hotute hian eng vak an sawi lo; NGO Coordination Committee te hi an duh an sawitir a, chu chu an lo ngaithla a, a tawpah member kima an lo ngaihtuah tur thuin an chhang a ni.
NGO Coordination Committee te hian Mizoram dinhmun, Mizoram Kristiante’n Chawlhni an hman dan an sawi a, Chawlhni-ah biak in hrang hrangah inkhawm vawi hnih vawi thum a awm a, chumi karah thalai leh hmeichhiate, mi dangin hun an hmang a, Chawlhni-ah nilengin Kristiante’n hun an hmang thin tih te an sawi.
Mizoram inthlan a fel fai thu an sawi a, hemi kawngah hian kohhran leh tlawmngai pawlte’n theihtawp an chhuah a, an thawhhlawk tih te sawiin, kohhran leh tlawmngai pawlte ngaihdan hi ngaih pawimawh thamah ngaih a nih thu an sawi bawk.
NGO Coordination Committee atang hian Central YMA president Lalhmachhuana leh general secretary Prof Malsawm-liana te, MUP vice president Lalbiakmawia Khiangte te, MZP president H Lalthianghlima leh MSU secretary Lalrampana te an kal.
“Beiseina kan nei a, an rorel dan tur kan hre lo na a, beisei chu kan nei,” Prof Malsawmliana chuan a ti a, ECI lam pawhin thu tihtluk thuai a ngai tih an hria a, an thu thlen chungchang hi an ngaihtuah thuai an ring tih a sawi bawk.
NGO Coordination Committee te hi ECI hotute hmu turin kar hmasa khan Delhi-ah hian an kal a, Zirtawpni khan ECI office-ah hian an lo kal tawh. Thawhlehni-ah ECI hotute an hmuh theih ang tih a nih avangin an nghak ta a ni. Nilaini hian Mizorama haw an tum.
Vote chhiar hun tur hi December ni 3, Chawlhni a ni a, NGO Coordination Committee hian Chawlhni leh Inrinni ni lo ni danga sawn turin an ngen a ni. A tirah Mizoram Kohhran Hruaitute Committee thlazar hnuaiah NGO Coordination Committee leh political party hrang hrangin vote chhiar hun sawn tur hian an ngen a, NGO Coordination Committee kutah dah a ni zui ta a ni.
Vote chhiar hun sawn chungchang ECI-in ngaihtuah dawn
