Election Commission of India (ECI) a\angin thu thar a awm a, Mizoram inthlan vote chhiar hun sawn an tum lo. Mahse NGO Coordination Committee te’n ngen zel an tum a, inhmuhkhawm thuai an tum.Central YMA hruaitute hnen atanga thu dawn danin, Mizoram CEO (Chief Electoral Officer) Mahdup Vyas hnen atangin message an dawng a, ECI-in vote chhiar hun sawn a tum lo tih a hrilh a, a chhan a sawi tel lo.
Central YMA hruaitute chuan NGO Coordination Committee an thutkhawm tur thu The Aizawl Post an hrilh a, Zirtawp zanah hian Central YMA hnuaia Central Executive Committee an thut tur thu leh, hetah hian NGO Coordination Committee thutkhawma an thu thlen tur te an sawiho tur thu an sawi bawk.
Central YMA hruaitute hian Zirtawpni hian CEO hi hmuh an tum a, thil awmzia chiang zawka hriat a tha e tih thu-ah hmaichhana kawm kan tum, an ti.
CEO Mahdup Vyas hian Delhi-ah zinin ECI hotute a hmu a, NGO Coordination Committee te’n vote chhiar hun sawn an dil chungchang a sawipui. Ningani khan Aizawl a lo thleng a ni.
Vote chhiar hun tur hi December ni 3 a ni a, Chawlhni a nih avangin NGO Coordination Committee kaihhruaiin kohhran leh political party te’n sawn turin ECI hi an ngen a ni.
A tirah chuan Mizoram Kohhran Hruaitute Committee (MKHC) kaihhruaiin NGO Coordination Committee leh political party hrang hrangin an ngen a, Chawlhni leh Inrinni ni lo ni danga sawn turin ECI hi an ngen. Kar hmasa Ningani khan MKHC hruaitute’n CEO an hmu a, CEO hnenah hian MPF leh political party panga, MNF, Congress party, ZPM, BJP leh AAP te’n ECI hnena ngenna an thlen. Hemi hnu hian MKHC chuan NGO Coordination Committee kutah a dah zui ta a ni. A hmain MKHC leh party hrang hrangin ECI hi vote chhiar hun sawn turin an lo ngen tawh bawk.
NGO Coordination Committee hruaitute chuan thutkhawma sawiho a tul tur thu an sawi a, an hmalak dan turah tum lawk emaw ruahman lawk emaw a awm loh thu, sawiho phawt an tum thu te, a theih ang anga ngen chhunzawm zel an tum thu te an sawi.
Vote chhiar hun sawn tum lo, NGO te’n ngen zel tum
