Election Commission of India (ECI) in Mizoram Assembly inthlan vote chhiar hun atana Kristiante ni serh Pathianni (December 3) a lo ruat tawh, Mizoram mipui ngenna avanga Thawhtanni (December 4) a sawn a ni chu lawmawm an tih thu leh ECI thuneitute chungah an lawm thu Zoram People’s Movement chuan an sawi.
ZPM working vice president K Sapdanga chuan thuchah siamin, vote chhiar hun sawn a nih theih nana rim taka hma latu zawng zawng chungah lawmthu an sawi a. A bikin hemi atana theihtawp chhuah a, sulsutu NGO Coordination Committee leh Mizoram Kohhran Hruaitute Committee fakawm an ti takzet tih a sawi.
2023 October 9-a inthlan hun puan a nih khan vote chhiar hun atana ruat December 3 kha Kristiante ni serh, Pathianni a nih vangin ZPM party chuan a tha lo hle a, inthlan puan tuk October 10 khan ECI hnenah vote chhiar ni sawn tura ngenna an party president Pu Lalliansawta hmingin an thlen nghal a. Chhanna an dawn tak mai loh avangin November 9 khan a tumhnihna atan ngenna an thlen leh tih a sawi.
“Vote chhiar hun sawn a nih theihnana kohhran mipui tawngtaina chhangtu Pathian chu fakin awm se, a hun taka thawk thin kan Pathian hian Mizoram mipui min hrereng a ni tih min hriat thar tirtu lo nise tih hi ZPM duhdan a ni,” a ti.
Vote chhiar hun sawn vangin ZPM an lawm
