Election Commission ruahman lawk angin December 3-a MLA inthlanpui vote chhiar turin Mizoram a inpuahchah zel a, November 27 hian vote hi chhiar chhin a ni dawn.Chief electoral officer Madhup Vyas chuan Ningani khan Mizoram district 11-a district election officer (DEO) te chu MLA inthlanpui vote chhiar tura inpuahchahna an kalpui tawh dan leh hmachhawpte inbiakhmuh theihna kaltlangin a sawipui.
CEO chuan vote chhiar turin inpuahchahna chak taka kalpui mek a nih thu sawiin, Election Commission of India (ECI) ruahman angin November 27-ah vote chhiar chhin ‘full dress rehearsal’ encore portal hmanga neih tum a ni tih a sawi a. DEO-te chu harsatna awm lo tura hemi atana inruahman lawk a, chawhnu dar 3.00 ah report pek vek hman tum turin a chah.
Inthlan vuakveta thil chhinchhiah tlak leh dangdai, entawntlak tak nia ngaih ‘best practices & innovation’ an neihte CEO office-ah November 30 ralhmaa thehluh hman tum turin DEO-te hi a chah a. An district theuha inthlan duty official hna thawk tha, chawimawi tlak nia an hriat chu ziaka thlen turin a chah bawk.
Vote chhiar hun, counting day bik atan ECI-in counting observer 40, assembly bial tin tan pakhat zel a ruat tih Madhup Vyas hian a sawi a. DEO-te chu RO’s Handbook rawn thin tura a chah bakah district magistrate an nih angin dan leh thupek kenkawh kawngah ruahmanna fel taka siam turin a chah a ni.
DEO 11-ten vote chhiar hun atana inpuahchahna kalpui dan leh hmabak la awmte an report a. Tun dinhmunah harsatna awm loa vote chhiar tura inpuahchahna tha taka kalpui mek zel a nih thu leh zawhfel thuai beisei a nih thu an sawi a ni.
CEO leh DEO ho thurel:
# EVM, postal ballot leh ETPBS/ ETPBMS hmanga vote tla chhiar dan tur
# Counting hall luh leh chhuah dana ruahmanna siam leh a hungna siam, daltu awm loa him taka strong room atanga counting hall-a EVM thiar dan tur, vote chhiar nana dawhkan leh hmanraw mamawh dang ruahman tulte
# Dan leh thupek kenkawh leh venhimna khauh taka kalpui dan tur
# Media Centre mumal tak siam leh round tin result-te mipui hriat tura puanzar nghal zel dan tur
# ECI duhdan anga boruak muanawm tak hnuaiah felfai taka vote chhiar a nih theih nana hmalak tulte
# A hun taka vote chhiar tan bakah a hma thei ang bera zawhfel a nih theih nana counting supervisor, counting assistant, micro observer, staff dang, hmanraw mamawh leh tul dang ruahman a nih dan
# Traning leh randomisation kalpui tawh dan leh hmabak awmte report a ni.