Serchhip district election officer, bawrhsap David Lalthantluanga hoin MLA inthlanpuia Serchhip district-a Assembly constituency pathuma vote tla chhiar dan tur leh inbuatsaihna chu Nilaini khan thlirho a ni.
Constituency pathum – Serchhip, Tuikum leh Hrangturzo tan Counting Hall pakhat theuh ruahman a ni a. Serchhip DC Conference Hall, DC Meeting Hall leh e-District chu Election Commission of India kaihhruaina leh duhdan anga cheithat niin, peihfel thawkhat tawh a ni. ECI duhdan angin Counting Hall chhungah hian CCTV vuah vek a ni a. EVM a vote tla chhiarna tur dawhkan 8 theuh siam niin, postal ballot chhiarna tur Serchhip constituency tan dawhkan pahnih, Tuikum leh Hrangturzo constituency tan dawhkan pakhat ve ve dah a ni a, VVPAT chhiarna tur a bika hung hran (enclosure) pakhat dah vek a ni bawk.
ECI-in phalna a pek authority letter nei chanchinbumite tan Counting Hall bulah Media Centre siam a ni a. Media Centre atang hian round tina vote tla chu mipui hriat turin aurinna hmanga puan a ni ang. Candidate-te leh an agent-te pualin Public Communication Room siam a ni dawn a. Media miten candidate-te interview an neihpui theihna tur a bika hmun ruat interview booth/ podium for candidates siam a ni dawn a ni.
Venhimna khauh taka kenkawh a ni dawn a. Official duty tur zawng zawng leh candidate/ counting agent-te chu identity card keng theuh tura hriattir an ni. Phalna nei lo tan Counting Hall chhung luh khap a ni a. Observer, RO leh ARO te chauhin Counting Hall-ah mobile phone an kenglut thei ang.
Counting official-te tan training vawikhat buatsaih a ni tawh a, a thawh hnihna December 1-a nei tum a ni. November 23 khan first randomization neih niin, December 2-ah second randomization, December 3 zing dar 5-ah randomization hnuhnung ber neih a ni ang.
Vote chhiar turin Serchhip inpeih
