Vote neih tum raltlante laka
fimkhur turin roll siamtu chah
Electoral roll ennawn mekah raltlan zinga vote neih tumte thunluh an nih lohna atan electoral roll buatsaihtute chu fimkhur turin Siaha district thuneitute an inchah.
Thawhtannia Siaha-ah electoral roll ennawn thar tlangzarhnaah District DRDO project director M Misael chuan vote thun chungchangah Myanmar ram buaina avanga raltlan mekte pawh vote neih tum tam tak an awm thei tih sawiin, chutiang laka fimkhur a tul thu leh political party-te leh NGO ho pawhin theihtawpa hma lakpui turin a ngen.
Final electoral roll hi Siaha district election officer, addl. DC Abraham Beirazi Khithie chuan a tlangzarh a. Saiha Assembly bialah mipa vote nei 11756 leh hmeichhe vote nei 12859 awmin, vote nei zawng zawng 24,615 an ni. Palak Assembly bialah mipa vote nei 10332 leh hmeichhe vote nei 10551 awmin, vote nei zawng zawng hi 20883 an ni. He bial pahniha vote nei zawng zawng chu 45498 an ni a, electoral roll hmasa nen khaikhinin Saiha bialah vote 335-a pungin, hei hi za zelah 1.38 a ni a; Palak bialah vote 405-a pungin, za zelah 1.98 a ni.
Vote neih tum raltlante laka fimkhur turin roll siamtu chah
