Dampa bial by-election vote thlak chu nimin khan boruak muanawm tak hnuaiah neih a ni a. By election chuhtu party-te an tang a, an thawm pawh a tha; hmun danga awmte pawhin general election ang thovin an ngaipawimawh a, vote thlak tura haw pawh an thahnem viau tih report dawn a ni.
Dampa bialah hian inthlanpui hnuhnung berah khan voter 18,239 an awm a, tun tumah hian voter 20,888 (21.10.2025) an awm ta a, a hma aia a tam zawkna hi 2,649 a ni.
Inthlanpui hnuhnung ber (2023)-a Dampa biala vote tla zat kha 86.23% a ni. Dampa bial hi tunhmaa inthlanpui neih tawhah pawh vote tlak thatna bial a ni thin.
Hriat theih chinah nizan dar 7 thlenga vote tla zat kha 75.92% a ni a. |um danga vote tlak thin dan ngaihtuahin, 80% chuang a tlin leh ngei chu a rinawm.
Inthlanpui hnuhnung bera thlan tlin Lalrintluanga Sailo vote hmuh zat kha 35.65% niin a dawttu Vanlalsailova khan 33.97% a hmu a, an inthlauhna pawh vote 292 a ni. Khami tum khan INC-in 18.04%, BJP-in 11.81% an hmu bawk.
Tun by election-ah hian MNF leh ZPM bawk hi a chung lama awm tura ngaih an ni a. 2023 election-ah khan, Minority lam kha an chan chhiatna niin ZPM lam chuan an insawi a, tun tumah hi chuan MNF aiin Minority lamah an chungnung zawk tawh niin an insawi a, ‘ruling power’ vauchher chunga campaign an ni bawk a, an ngaih a tha thawkhat hle ang tih a rin theih awm e.
Dampa bial hi Congress thuthmun deuha ngaih a nih laiin 2018 inthlanah Lalrintluanga Sailo (MNF) chuan bialtu ni lai Lalrobiaka (INC) chu 10% chuang lawiha khumin hnehna a chang a. Inthlanpui 2023-ah hneh taka thlan tlin leh a ni a. Dampa biala MNF an tlo dan ngaihtuah chuan, tun by election-ah pawh hian, voter pun belhna 2,649 zet a lo ni bawk nen, an campaign boruak thlirin, tlinna chance a sang hle bawk awm e.
INC leh BJP te pawh, inthlanpui lo awm tur thlir ran chunga campaign an ni bawk a, an tang bawk a, vote hi an pu darh ve nual dawn tih a chiang a, MNF leh ZPM tan pawh inchhut thiam a harsa khawp ang le.
Vote thlak a ni ta a….
