Naktuk Zirtawpni atang hian India chuan parliament member 543 thlanna a kalpui tan dawn ta a. India ram mipui tluklehdingawn 1.4 zingah mi maktaduai 968.6 in vote an nei a; hei hi Europe khawmualpuia mihring awm zawng zawng maktaduai 448 let hnih aia tam a ni a; India ram inthlanpui hi khawvela inthlanpui lian ber tia chhal theih a ni. Heti zat voter-te hian kan aiawha ram rorel hna thawk tur kan thlang chhuak dawn a ni a, roreltu tur thlang turin mipuiin ro kan rel mek tihna a ni ber awm e.
India ram state leh UT 36 zingah Mizoram state chuan Lok Sabha-ah MP pakhat kan nei ve a. State leh UT zat atanga chhut chuan state leh UT tin hian chawhrualin MP 15 nei theuh ang kan ni a, mahse population tam leh tlem azira MP neih theih zat hi bituk a nih avangin Mizoram, mipui tlemte awmnaah chuan MP pakhat ve ve (Lok Sabha & Rajya Sabha) kan nei thei tawk a ni.
Tun tum Lok Sabha inthlan turah hian Mizoramah chuan voter 8,61,277 an awm a, Mizoram bialtu tur MP pakhat thlan tur a ni a, mi heti zat hian roreltu tur thlang turin ro kan rel mek a, kan thutlukna chu Zirtawpni-ah kan tichiang dawn ta a; Mizoram mipuiin ro kan rel mek a ni ber.
Mizoramin MP thlan kan lo hmachhawn tawh chinah 1977 kha vote tlak chhiat ber tum niin 49.92% a tla a. Mizoramin MP a thlan ve tanna a nih avangin mipuiin kan la bengkhawn thiam lutuk lo. A tum hnihna 1980-ah erawh 56.12% niin hemi hnu lamah hi chuan 56% chunglam vek niin 1996 kha vote tlak that ber tum a ni a, 73.41% a tla a. Khami tum kha Dr C. Silver-a term hnihna a ni a, khata tang khan a hniam lamah tla thla lehin 69.56% te, 65.31% te a ni chho zak zak a. Kum 2009 a lo thlen meuh chuan 51.80% ah a tla thla leh ta vawn vawn mai a. Kum 2014-ah 61.95%, 2019-ah 63.14% niin, a sang zawngin a kal chho leh ta a.
Tun tumah hian 70% aia sangah a lawn chhoh a rinawm a, a chhan pawh Assembly election-ah khan 82% aia sang a tla a, vote thlak pawimawhna leh hlutnate kan inhrilh ngunin awareness campaign tha taka kalpui a nih avangin, vote tlak that ber tum 1996-a vote tla 73.41% kha kan khum theih beiseina a lian hle a ni.
Thufingin mi pakhat thluak aiin mi pahnih thluak a fing, a lo tih angin, vote thlaktu an tam poh leh mifing, mi tha, ram tana mi chhenfakawm kan thlang thei dawn tihna a ni. Rorelnaah mipui a tam thei ang ber tel i tum ang u.
Vote thlak- mipui rorelna
