Lok Sabha inthlanpui atana inpuahchana kal mekah April 15 zan khan Zemabawkah district election officer Aizawl Nazuk Kumar hoin vote thlak tura mipui sawmin street campaign neih a ni. Systematic Voters Education and Electoral Participation hmalakna in Zemabawk Bazaar kawnah vengchhung thalai hnenah inthlan pawimawhna inhrilhhriat a ni.
DEO chuan thalaiten vote thlak leh inthlan an ngaihpawimawh a tul, tiin, India ram mipui zinga a tam ber chu thalai an nih avangin mipui sawrkarna ram kan nihna humhim turin thalaite chu ram nghahfak tak tak an ni, tih a sawi. History enin, mi tam takin an nunna hial thapa vote an neih theih nana hma an lo lak tawh thin dan leh, vawiin thlengin ram thenkhatah chuan vote neiloa ram inrel bawlnaah pawh telna reng reng neilo khua leh tui an awm thu sawiin, “Kan vanneihna leh kan hlutna hi kan hriatchian a pawimawh,” a ti.
SVEEP Aizawl District nodal officer C Laltleipuii chuan MP inthlan hnuhnung berah Aizawl khawpuia vote tlak that tawk lohna (low voter turnout) area zingah Zemabawk chu a tel tih sawiin, ECI-in low voter turnout area-a he campaign hi buatsaih tura a beisei anga he programme hi kalpui a ni tih a sawi a ni. Aizawl khawpui chu tun MLA inthlan zawh takah pawh Mizorama vote tla zawng zawng aia a hniam thu sawiin, “Kan zavaia ka tan tlan a pawimawh a ni,” a ti.
Vote thlak ngaipawimawh turin sawm
