Kumin Mizoram MLA inthlanpuia vote a tlak that nan leh voter ten duhthlanna dik an siam theih nan SVEEP (Systematic Voters’ Education and Electoral Participation) Aizawl District chuan chanchinbute tan inelna – editorial competiton ‘Bouquet of Words’ a buatsaih a. Chu’nga titha thlanchhuah pathum hnenah Aizawl district election officer, bawrhsap Nazuk Kumar chuan a pisa-ah anmahni kawmin lawmpuina thuziak leh sumfai a hlan.
Newspaper editorial competition-ah hian October 16 atanga November 7 chhunga newspaper-ah SVEEP thupui ‘Greater Participation for Stronger Democracy’ leh a thil tum zulzuia editorial chhuah tam ber pathum chu lawmman dawng tura thlan an ni a. Lawmman dawngtute hi Virthli, Vanglaini leh The Aizawl Post an ni. An vai hian lawmpuina thuziak leh sumfai Rs. 5000 theuh pek a ni.
Lawmman pekna hunah hian Aizawl DEO chuan Mizo mipui chu dan zahna leh ngaihpawimawh nachang hre ber zing ami nia a hriat thu sawiin, press mite pawhin hemi atan hian hna pawimawh tak an thawk tih a hriatpui tih a sawi a. Tun inthlanpuia thuthar thehdarhtute hnathawh danah lawmthu sawiin, sawrkar an tawiawm dan leh inthlan felfai tak nei thei tura an hmazawna theihtawp an chhuah danah lawmthu a sawi a ni.
Chanchinbu aiawhte chuan inthlan muanawm leh felfai neia vote thlak tura mipui sawmna thu an lo ziah chu an mawhphurhna ve reng a nih thu leh, lawmman beiseia ziak an nih loh thu an sawi a. Chuti chunga Aizawl DEO leh SVEEP Committee-in ruahmanna an siam kaltlanga lawmpuina an dawng chu lawmawm an tih thu an sawi a ni.
He hunah hian SVEEP Committee aiawhin assistant nodal officer leh member-te an tel a ni.
Vote thlak tura inzirtirna kalpui tha chanchinbute lawmpuina hlan
