District Election Office Khawzawl leh Sub Hqrs YMA Khawzawl inremna thuthlung bawhzuiin 22-Tuichang Assembly constituency huamchhunga vote tlak thatna YMA Branch te hnenah Zirtawpni khan lawmman hlan a ni.
Kumin inthlanpuiah khan Khawzawl district administration hnuaia MLA bial awmchhun Tuichang biala vote a tlak that theih nan Khawzawl DEO-in nasa taka hma la in, hmalakna peng pakhatah Sub Hqrs YMA nen inremna siam niin, YMA Branch hrang hrangin an chanchinbu leh aurinna hmangin vote thlak tura mipui ngenna an siam a, intlar ngai loa mipuiin vote an thlak theih nan branch tinin ruahmanna an siam bawk.
Khawzawl addl DC Lalfakzuala chuan Tuichang bialah kum 2018 inthlanpuia vote tla (80.07%) aiin kumin inthlanpuia vote tla (84.49%) chu za zela 5-in a pung tih a sawi. Vote tlak that theihna tura hmalakna hrang hrang sawiin, Tuichang biala polling party-ten an duty-na hmun tur an thlen kim hmasak ber thu te, inthlan zawhah pawh an thlen khawm kim leh hmasak ber thu leh Mizorama vote chhiar zo hmasa ber bial an nih thu a sawi a ni.
District election officer, bawrhsap K Lalrohlua chuan an district-in a tumkhatna atan inthlanpui a hmachhawnnaah vote a tla tha chu a lawmawm tih a sawi a. Vote tlak that lehzualna tura hmachhawp awmte sawiin, kumin inthlanpuia vote tlak that theih nana thawktu YMA Branch tin leh MPF chungah lawmthu a sawi a ni.
Vote tlak thatna YMA branch chu: 1-na Hmuncheng Branch (Rs. 12000), 2-na Tlangmawi Branch (Rs. 7000), 3-na Arro Branch (Rs. 5000) a ni a. YMA Branch pasarih – Lungtan, Khualen, Vangtlang, Chawngtlai, Chawngtlai Phaiveng, Riangtlei leh Khawzawl Darngawn hnenah consolation prize Rs. 1500 theuh hlan a ni.
Vote tlak thatna YMA Branch tan lawmman
