Lok Sabha inthlanpui neih zawh taka Lawngtlai district-a kum 100 chuanga upa vote thlakte hnena chawimawina pek tura ruahman chu Thanglianhluma (104), Lawngtlai College Veng hnenah hlan a ni.
Lawngtlai district election officer Cheemala Siva Gopal Reddy ruahmannain an district-a kum 100 chuanga upa Lok Sabha inthlanpuia a vote thlakte chu chawimawina thuziak leh ngaihhlutna thilpek (rice cooker) hlan nise, tih a ni a. Hemi bawhzui hian April 19-a 37/17-College Veng South, Lawngtlai polling station-a vote thlak Thanglianhluma chu Thawhtanni khan election officer Denny Lalchhuanawma leh SVEEP nodal officer C Lalhruaitluanga ten an inah chawimawina hi an hlan.
Lawngtlai district-ah hian kum 100 chuanga upa vote thlak pahnih an awm a. Pakhat zawk chu Famiangi (116) Pangkhuaa niin, kum upate tana in lama vote thlak theihna (home voting) ruahmanah vote a thlak a. Ani pawh hi remchang hmasaah chawimawina thuziak leh ngaihhlutna thilpek hlan tum a ni.
Voter upa hnenah chawimawina hlan
