VUC hmaa an thutiam an
bawhchhe deuh vek tawh
– Lalnunmawia
MLA inthlan dawna ZPM candidate-ten thlantlin an niha an tih tur leh tih loh tura thu an tiam chu kum khat an sawrkar chhungin an bawhchhe deuh vek tawh tih Congress hruaitu Lalnunmawia Chuaungo chuan a sawi.
VC inthlan neih zawh taka Champhaia INC ticket-a thlantlinte lawmpui leh chawimawi hun a hmanpuinaah MPCC senior vice president chuan, ZPM chu tawngkam an thiamin thu dik lo sawiah pawh an inthlahrung lo hle niin a sawi a. Congress sawrkarin theihtawp chhuaha hmasawnna hna a lo thawh tawhte hre duh loin, engmah thawk lo angah an chhuah thei a. Mipuiah thu an tiam nasain mipui rilru an hneh hle tih a sawi.
“Val Upa Council-in sawrkar an khalh ngil ang, tih pawh vawiinah chuan VUC hming hriat tur a awm ta lo. VUC hmaa ZPM MLA candidate turten thu tiama an sawi rual thup thup chu kum khat an sawrkar chhungin an bawhchhe deuh vek tawh,” a ti.
NLUP chu changtlung zawk leh tha zawkin an kalpui dawn tih sawiin, tuna sawhthing chinga hralh hleithei lo, manganga awm mekte, an hmuhphiah hralh theih loh avanga beidawnga indawmkun mekte tan Congress party chuan NLUP tha leh changtlung zawk a kalpui dawn tih Lalnunmawia Chuaungo hian a sawi.
“Mipuia sum leng vak a tam theihna tur hi Congress party chuan a ngaipawimawhin NLUP avanga ding chhuak leh an tu leh fate tana pawha chhunzawm theih eizawnna hi kan buatsaih a ngai. ZPM-in research base-a an kal ang mai maiin keini chu chu kan kal ve dawn lo. Miretheite khai chhuah hi Congress party thil tum ber leh a tihmakmawh a ni,” a ti.
Sawrkarin nikum lamah thlai thar leina atan cheng vaibelchhe 110 a dah chungin, kuthnathawktute tan cheng khat pawh an seng lo tih MPCC hruaitu hian a sawi. Kuminah tal chuan ruahmanna felfai zawk nen kuthnathawktute chawi chhuak turin hma an la tawh ang chu, tia beiseina sang tak nen an thlir laiin, kuminah pawh an kalphung a fel loin sawhthing chingtute an mangang hle a. Hei hian kuthnathawktute an ngaihpawimawh tak tak loh zia a tarlang chiang tih a sawi. “Keini chuan hetiang a thlen lohna turin kan sawrkar hunah hma kan la dawn a ni,” a ti.
VUC hmaa an thutiam an bawhchhe deuh vek tawh – Lalnunmawia
