VUC-in eirukna lakah
thikthu a tichhe dawn
– Bualhranga
Sawrkar tharah eirukna leh kalsualna lakah Val Upa Council (VUC) chuan thikthu a tichhe dawn a, line a rin chin pel te lakah ngaihnatthiamna a awm dawn lo tih VUC member Bualhranga chuan a sawi.
Thawhlehnia ZPM party office-a inkhawmah VUC member Bualhranga chuan corruption do ngam chief minister an neih dawn avangin a hmalakna zaah zain an thlawp dawn a, VUC chuan eirukna laka fihlim tura intiam an MLA-te khawng takin an venpui dawn bawk tih a sawi.
“VUC-in sawrkar tharah eirukna leh kalsualna lakah thikthu a tichhe dawn a, red line a siam anga, chumi pela chete lakah zero tolerance a siam dawn,” a ti.
Corruption chungchangah VUC-in sehna tur ha hriam tak a nei a, chief minister atanga minister leh MLA-te a tul a nih chuan a seh hreh dawn lo tih Bualhranga hian sawiin, “Corruption do ngam chief minister kan neih dawn avangin hemi kawngah hian a hmalakna zaah zain kan thlawp dawn. Ram siamthat kan tum a, mi hlemhle leh dik lote dik lohna a lan zel dawn avangin eirukna kan khawi ngam ve dawn lo,” a ti.
Politics-ah chuan miin thuneihna pumhlum a neihin a corrupt-a ngaih a ni thin a, tun hnuah erawh ram tam taka hruaitu thuneihna sang tak neiten nasa takin ram an siamtha a, ram hnufual atangin ram changkangah an siam thei leh tawh thung tih a sawi.
“Chutiang sawi tur ram chu Europe-ah sawi tur an tam a, Asia khawmualpuiah pawh Singapore chu ram rethei leh hnufual ni thin mah se, kum 20 chhungin ram changkang leh hausa takah an insiam thei. Nitish Kumar-an Bihar a siam lian thei a, keini Vanapa thlahte pawhin kan tih ve theih lohna tur a awm lo. Kan hmaah chona lian tak a awm a, chhang ngam rawn penchhuakten hnathawh kawr hain ram rawng an bawl dawn a, beiseina sang tak kan nei a ni,” VUC member hian a ti.
ZPM inkhawmah hian MLA inthlanpui neih zawh taka an party hminga MLA candidate thlantlinte inhmelhriat tir an ni.
VUC-in eirukna lakah thikthu a tichhe dawn – Bualhranga
![](https://theaizawlpost.org/wp-content/uploads/1-233-1024x576.jpg)