China foreign minister Wang Yi chuan Ukraine indona kal mekah Beijing chuan Russia a pui tia Nato-in a puhna chu ‘behchhan nei lo’ tiin a sawi a. Chu mai bakah Western alliance te chu inbakkaihna tihpunlun tumah a puh bawk.
Washington DC a inhmukhawm Nato hruaitute chuan a hma lawkin declaration an siamah China chu ‘Russia defence industrial base lian tham taka thlawpin’ China chuan Russia chu nasa takin a tichak a ni tiin an sawi a ni.
Nato hruaitute chuan China chu Russia chu civilian leh military a hman theih ‘material leh political support’ a pek zawng zawngte titawp vek turin an ngen bawk a.
Khawthlang ram te chuan a hma pawhin Beijing chu Moscow hnena drone leh missile technology bakah satellite imagery te pe ah an puh tawh bawk a. US chuan Russia-in machine tools 70% leh microelectronics 90% te chu China atanga a chawkluh tiin a sawi.
Hei bakah hian Beijing chu ‘cyber leh hybrid activities mi tihchhiatna tur kalpui’ ah leh Nato member states te laka disinformation kalpuiah an puh bawk a.
Ningani khan US President Joe Biden chuan press conference a neihnaah Nato hruaitu dang te nen China laka chetlak theih dan tur an sawiho tiin a sawi a.
“China hian chiang takin Russia hnena information leh capacity supply a kalpui reng a, North Korea nena thawk duna Russia ralthuam lama an tanpui reng chuan chumi nghawng chu tawkin economic lamah hlawkna an neih phah dawn lo tih a hre tur a ni” tiin Biden chuan a sawi a.
“Kan European thian te hian China a investment tih an titlem nasa mai dawn a ni” tiin a sawi bawk.
Russia chuan China leh North Korea atangin ralthuam chawkluh dan a ngaihtuah reng tia sawi bawkin Nato states te pawhin Khawthlang ram te chu munition leh weapon system thar siam nan ‘industrial base’ a chhuah turin policy an ngaihtuah a ti bawk.
Netherland foreign minister thar Caspar Veldkam nena inbiakna an neihah Wang chuan, “Heng puhnate hi China chuan a pawm lo bur” tia sawiin ‘remna leh muanna leh ngelnghehna chu China duh ber a ni’ ti bawk a.
China-in political system hrang daih a neih chu Nato chuan China nena inngur theihna tur chhuanlamah hmang suh se ti bawkin Nato chuan an ramri an pel tur a ni lo a ti bawk.
A hma lawkin China foreign ministry thupuangtu pawhin Nato chu siamchawp information dik lo hmanga China tihhmingchhiat tum a lo ti tawh bawk a. EU a Beijing mission pawhin China vauna chu kalpui lo turin Nato a lo hrilh tawh bawk.
Beijing chuan Ukraine indonaah Russia a pui tia puhna chu hun rei tak ata tawh a hnawl char char tawh a, neutral a inti bawk. Ukraine indona a tawp theih nan peace plan siam bawkin chu chu Ukraine-in a hnawl hmak thung.
China-in Russia hnena military support a pe tih lai hian observer te chuan Beijing chuan tun hnaiah oil leh gas tam tham tak Russia leisakin chu chuan Russia economy hrekna avanga hniam zual zel leh indona avanga harsatna tawk chu a chhan nasa an ti thung.
China chuan tun thlengin Ukraine indona tih chu indona a la ti ve miah lo bawk a. Chinese President Xi Jinping chuan Russian President Vladimir Putin nen inzawmna tha em em la nei rengin tun hnai lawkah pawh ram pahnih inthianthatna chuan ‘limit a nei lo’ an ti dun bawk.
Beijing chuan US leh khawthlang ramte chu ralthuam hlauhawm Ukraine hnenah pein chu chuan buaina a tipunlun zawk tiin a sawi bawk.
Wang Yi-an Nato chhanglet sak
