Washington-ah Zelensky leh Trump inkawm dawn
Ukrainian President Volodymyr Zelensky chuan US President Donald Trump chu Washington-ah Zirtawpni hian an ram leilung hausakna inpek dan turah a hmu dawn tih Trump-a’n a sawi.
Zelensky-a chuan an inremna hi tunah chuan a thuphung mai chauh a nih thu a sawi a, inremna thuk zawk, Russia-in an ram a rûn lo hnawt let thei tur khawpa US atanga himna a duh tel.
Trump-a erawh chuan US chuan tuna an kalpui ang bak thil a theih loh thu leh a mawhphurtu zawk chu Europe a nih thu a sawi thung.
Trump-a hian Ukraine leh Zelensky-a’n a duh, Nato member an nih chu tul a ti lo bawk.
Nilainia a cabinet thutkhawmah Trump-a hian Ukrainian leilung atanga American hnathawkten leilung hausakna vâng la chhuak tura hna an thawh chuan Ukraine chu ‘automatic-in a him nghal’ dawn tih a sawi.
Kyiv chuan Nato zawm chu ‘theihnghilh se’ a ti a, hei hi Russia pawhin a beih chhan ber a ni tih a sawi nawn leh bawk.
US president hian Ukraine leh Russia inbeihna chu a tawpna a hla lo tih a sawi a, “Russia leh Ukraine nen mihring thah titawpna turin ruahmanna kan siam mek,” tiin thuthar lakhawmtute a hrilh.
Hetih lai hian Zelensky-a chuan himna tha tawk an neih hma loh chuan ‘inkahhai kan nei lo vang, engmah tak tak a ni dawn chuang lo’ tih a sawi.
“Nato lam pan emaw, thil dang tha emaw a ngai,” a ti.
Russia hian Ukraine-in Nato a zawm hi a duh lo va, an sipaiten an ramri an hnaih lutuk a hlau.
Kum 2008 tawhah khan tangrual pawl hian Ukraine-in a zawm mai theih thu a lo sawi tawh.
Trump-a chuan inkahhaiah European peacekeeping force-te chu Ukraine-ah an awm thei tih a sawi a, hei hi Russia-in a duh lo veleh thung.
Zelensky-a leh Trump-a inbiakna tur, minerals deal hi Nilaini tlai khan Ukrainian sorkarin a pawm a, Trump-a nena an inkawmna an thil sawi chhuahah a innghat tawh.
Inremna tura an tihte chu puanzar la ni lo mah se Ukrainian Prime Minister Denys Shmyhal chuan Ukraie tun din lehna tura sum thawh pawh a tel tih a sawi.
Hemi chungchang hi nikum kum tawp khan Zelensky-a chuan duangin hei hi US-in nasa zawka Ukraine a thlawp theih nana a tih a ni.
Hetih lai hian tun hnaiah Trump-a leh Zelensky hi an inbaihkkai viau thung.
Ukrainian president hian US-in leilung hausakna chan ve nan $ tluklehdingawn 500 pek an tum chu a hnawl nia sawi a ni a; mahse, he hnawlna hi hnawl a ni leh tawh lo niin chanchinbute chuan an tar lang hlawm.
Trump-a hian Ukraine indo hi tihtawp thuaia Russia nen pawha inkawmngeih a duh a. Phone-a Russian President Vladimir Putin nen an inbiak hnuah hruaitu pahnih hian Saudi Arabia-ah an aiawh tirin an inbia a, Ukraine a tel lo.
Hemi chungchangah hian Zelensky-a chuan US chu Putin-a puiah puhin Trump-a chu Russian thu dik lo vawrh darhna khawvelah a cheng niin a sawi bawk.
Ukraine hi ram leilung hausa niin Kyiv chuan thil siamna atana pawimawh hmanrua (raw material) 5% chu an rama awm niin a chhut a; mahse, tam tak hi duh duhin an hmang thei lo.
Thil hlu awmna tam tak chu Russia-in a la a. Economy Minister Yulia Svyrydenko chuan $ tluklehdingawn 350 man vel Russian thuhnuaiah a awm tih a sawi.
Washington-ah Zelensky leh Trump inkawm dawn
