Mizoramah pawh khawvel dangte rualin nimin khan World Water Day kan lo hmang liam leh ta a. Khawvelin WWD a hman tan 1993 atang chuan kumin hi a vawi 31-na a ni ta a. Mizoram chuan 2012 atanga kan hman ve chauh avangin kumin hi WWD kan hman vawi 12-na a ni. WWD kan hman thin atanga Tui pawimawhna kan hriat zual deuh deuh avanga tui dehchhuah lama hmasawnna eng chen nge kan neih tak tih hi zawhna pawimawh tak a ni awm e.
WWD hi urhsun angreng takin kan hmang ve thin a, mahse tuihna a pun phah lova, tui kan awlsam phah sawt bawk lo va, tuihna a kang tial tial a, tui kan harsa tial tial zel zawk.
Kumin thupui “Water for Peace” tih pawimawhzia hi a thu-a sawi liam puat mai chi a ni lova, kan dinhmun mek han thlir hi chuan, a taka hlenchhuah tuma hma la bawrh bawrh nghal tur kan ni tih a lang reng awm e.
Water for Peace awmzia hi ‘Inrem nan tui’ tih ni maiin a lang a; chu chuan “innghirnghona awm thin tih reh nan tui hmang ang u” tih lam a kawk chiah lo va. Tui harsatna avanga innghirnghona thleng lo tura hnianghnar taka tui neih a pawimawhzia lam a kawk a ni.
Kan ramah hian tui harsatna hian innghirnghona lian zawk a chawk chhuak ang tih hlauhawm khawpin a kum telin tui lama harsatna hi a zual zel niin a lang a. Hei hi chu domestic problem a la ni mai a. Khawvel huapa tui harsatna hian tui inchuhna avanga ‘indona’ hi a la chawk chhuak thei tih hi mithiamte leh thil chikmite sawi dan a ni a. Tui hnianghnar taka lo nei bikte pawh an him lo mai dawn a, an aia chak zawk ram ten chhuhsak tumin an rûn an rûn mai dawn tihna a ni thei awm e.
Chuvangin, khawvel huapa engkim hi ngaihtuah a ngai tawh a, tanrual a ngai a, chumi atan chuan mahni awm hmun theuha awmze nei taka tan lak tlan hi tui inchuha ram leh ram indona thleng thei danna atana hmanraw pawimawh tur a ni. Kan ram chhung ngeiah pawh tui inchuh avanga buaina thleng a awm fo tawh a nih hi. Mizoramah pawh hian tui harsatna avanga inthenawmna boruak chhiat phah sawi tur an awm nawk tawh mai awm asin.
Water for Peace
