Water transport atana hma lak dan sawi

Water transport atana hma lak dan sawi
Ministry of Ports Shipping & Waterway atanga Mizoramin Khawthlangtuipui – Tuichawng atana inland water transport siamna atana sum a rawn pek chungchang, The Aizawl Post editorial (13.1.2025) in mipui hnena sawifiah tura Mizoram Transport department a ngenna chu tihlawhtlingin tunhnai khan Mizoram Transport department chuan hemi chungchang hi a sawichiang.
The Aizawl Post-in sawifiah tura a ngen hi – 2025 January 10-a 2nd meeting of Inland Waterway Development Council-a Mizoram IWT tana cheng vaibelchhe 12.1 ruahman a nih thu tarlan leh, Press Information Bureau thuchhuah (2.3.2022) in he project tho tan cheng vbch 22.93 ruahman a nih thu a lo tarlan tawh chungchang a ni.
Transport department chuan hemi chungchang a sawifiahnaah, Inland Water Transport (IWT) chungchanga Khawthlangtuipui – Tuichawng hmalak tawh dan chu – i) Kum 2018 khan Mizoram PWD hnuaiah M/s RITES Ltd Gurgaon Haryana-in detailed project report (DPR) a siam a. He DPR-in total project cost atan a tarlan chu cheng vbch. 22.93 a ni. 2019 June 19 atangin IWT subject hi Transport department-in a la tan a. Ministry of Ports Shipping & Waterway-in DPR a pawm theihna atan hma lak nghal a ni.
DPR hi MoPSW chuan a pawm a. 2021 December 30-ah first phase atan MoPSW chuan Rs. 6,17,86,000 a sanction a; first installment atan Rs 1,23,57,000 a release nghal bawk. e-Tender kaltlangin he project thawk tur hian M/s Coastal Consolidated Structure Pvt Ltd. Vijayawada, Andhra Pradesh thlan a ni a, work order hi 2023 July 17-ah pek fel a ni.
2024 March 2 khan M/s Coastal Consolidated Structure Pvt Ltd hian lehkha a thehlut a. He project atanga inhnuhdawh a duh thu an sawi. Inhnuhdawh a duhna chhan a sawi chu, DPR siamna a rei tawh a, DPR siam hunlaia thil man leh tuna thil man a insan hleih lutuk tawh vang a ni.
Hemi chungchang hi MoPSW hnenah thlen nghal a ni a. An remtihna in Coastal Consolidated Structure Pvt Ltd contract hi cancel a ni. 2024 March 4-ah MoPSW chuan IWAI chu implementing agency-ah a ruat a. MoPSW thupek angin sum sanction sa pawh IWAI account-ah transfer vek a ni.
MoPSW duhdan angin IWAI official pahnih, M/s RITES Company Ltd aiawh leh Transport department chuan 2024 June 26-ah joint survey an nei tha leh a. Inspection report thehluh nghal niin, inspection report behchhana lWT tihhmasawnna atan IWAI-in MoPSW-a proposal cheng vbch. 9.80 man a thehluh chu an pawm ta a ni.
2nd meeting of IWDC, Guwahati-a neihah Development of lWT on River Khawthlangtuipui – River Tuichawng atan vbch. 9.80 man pawm a nih thu leh hma lak zui a nih tur thu puan a ni a. Tunah hian thawktu tur IWAI lamin an zawng leh dawn a ni.
Hei bakah hian 2nd meeting of IWDC-ah hian Mizoram tan heng project – Tlawng luia IWT atana hmalaknaah DPR siamna atan cheng vbch. 0.89, Chhimtuipui luia IWT atana hmalakna tur DPR siamna cheng vbch. 0.41 leh a dangah. a vaiin cheng vbch. 12.1 chu Mizoram tan bika IWT project phalsak an puan zawng zawng a ni tih a sawi bawk.