Weimer Triangle tharthawh leh

Poland, France leh Germany te chuan Europe security leh defence tihchangtlun mai bakah Ukraine nasa zawka thlawp an tum thu an sawi a. Hei hi Donald Trump an White House luah leh mai thei dinhmuna dinga Russia in a ram zauh a tihnat a remtih hlauhna vang a ni.
Ram pathum foreign minister te chu Paris daifema La Celle-Saint-Cloud ah inhmukhawmin Ukraine leh issue pawimawh dang te an sawiho a. Weimer Triangle chu tharthawh leh remtiin hei hi France, Germany leh Polanf tena regional grouping siama thawhhona tha zawk an neih theih nana ruahmanna a ni.
Polish Prime Minister Donald Tusk chuan French President Emmanuel Macron chu Paris ah hmu in Berlin ah pawh German Chanellor Olaf Sholz chu a hmu bawk a, European partners te nena thawhhona tha zawk a duh tiin a sawi a.
“Russia aia military lama kan nep zawkna chhan tur reng a awm lo va, chuvang chuan production kan tihpun a ngai a, kan thawhhona a that a ngai a ni” tiin Tusk chuan a sawi a. European Union chu ‘military power’ a ni tur a ni a ti bawk.
Hetianga Weimer Triangle tharthawh leh tum a nihna chhan hi Trump an tun hnai lawka NATO member te defence lama sum thawh tlem te chu Russia in run mahse pawi a ti lo tihawi zawnga tawngkam a neih vang a ni.
“Sum in pe lo a nih chuan intihtur inti lo a ni mai lawm ni?” tiin Trump chuan NATO member te chungchang a sawi a. “kan hum tawh dawn lo che u a. An duh duh an tihkhum che u kan reti ang. Sum inpek a ngai a, in bill in pek a ngai” tiin a sawi a ni.
Republic front-runner in campaign neihnaa tawngkam a neih hi front-line NATO ram Poland te an Indopui II laia German leh Soviet hmachhawna a hnuah Soviet thununna hnuaia kum sawm chuang awm tan chuan a na hle a. Poland ramri chhak lamah indona a thleng mek bawk si a ni.
Scholz chuan Trump thusawi chu nataka chhang letin, “NATO hian member tin te humhim a tiama ni” tiin Trump hming lam chuang si lovin a sawi a. “NATO support guarantee namnul tumna a piang chu thil tha lo leh hlauhawm a ni a, Russia tana hlawkna chauh a ni ang” a ti a. “Tute mahin Europe secueity hi an play kan remti dawn lo” tiin German Chancelloer chuan a sawi bawk.
Tusk pawhin European ram te chu military project lam buaipui nasa tura ngenin ‘a rang thei ang berin thla reilote chhungin air defence lam kan thuam that a ngai a, ammunition siam chhuah lam pawh kan tih nasat a ngai’ tiin a sawi bawk.
Trump tawngkam chungchangah pawh Tusk chuan ‘Europe in chona a hmachhawn mek laia kan hriatchian theih nana tui vawta inbual ang a ni’ tiin a sawi bawk.
Macron pawhin Europe chuan Ukraine in a mamawh te tam zawk a pelut ang a ti bawk a. EU ram 27 te chuan Ukraine hnenah a economy siamthat nan 50 billion euros pek an remti bawk a. “He mi hmang hian Europe security leh defense power te NATO tana pawimawh leh Atlantic alliance pillar chu a tichak dawn a ni” tiin Macron chuan a sawi.
Trump thusawi hian thlantlin leh a nih chuan Russia in Ukraine ram a run te chu a remti dawn tia ngaihna a thlen a. NATO Secretary-General Jens Stoltenberg chuan thuchhuah siamin Trump thusawi chuan American troops leh an allies te chu dinhmun derthawngah a dah a ti bawk.
Weimer Triangle hi kum 1991 khan Poland communism atanga a talchhuah hnuah din niin ram pathum tena political cooperation tha zawk an neih theih nana din a ni.
Polish Foreign Minister Radek Sikorski chuan ama h leh French leh German hotute inhmuhna chu pawimawh chungchuang tia sawiin Russian President Vladimir Putin hi Ukraine indonaah a chak kan remti ngai dawn lo va, Ukraine laka kan mawhphurhna te kan hlen ngei ang a ti bawk.
French Foreign Minister Stephane Sejounre pawhin minute tinah European te chuan Donald Trump thusawi atang thil thleng theiah kan inpuahchah a ngaih zia a lang a ni tiin a sawi bawk.
Sejourne chuan France, Germany leh Poland te chuan foeign disinformation operation abik takin Russia atanga chhuak te beihletna tur cooperation agreement thar an duan tur thu a sawi bawk.