Wenger-a’n India talent haichhuahpui a tiam

Wenger-a’n India talent haichhuahpui a tiam
India rama football hmasawnna hna kalpui mek hmuhpui tur leh FIFA zawn atanga puihna awm thei rawn zirchiang pah tura India leilunga tirhluh mek Arsene Wenger chuan Thawhtanni khan New Delhi lo thlengin, Thawhlehni khan Bhubaneswar khawpuia FIFA-AIFF academy a hawng a, he hunah hian India rama football talent haichhuahpui ngei a intiam thu sawiin, khawvel football map-a a zinna ram tarchhuahpui ngei a tum thu a sawi.
Tarlan tawh thin angin, Arsenal coach hlui Wenger hi FIFA chief of global football development a ni mek a; India ram FIFA leh All India Football Federation thawhdunna academy hawng tura lo kal a nih bakah he rama football hmasawnna thlentir dan tur rawn zirchiang tura tih a ni bawk.
Bhubaneswar khawpuia thu a sawiah French coach hian India rama talent inthup haichhuahpui ngei a tiam thu sawi mah se he ram atanga player ropui lo chhuah hun tur erawh a bithliah thei bik lo a, a bulthum atanga zirna (grassroots development) pangngai tak atanga hlawhtlinna kawng an zawn zel tur thu a sawi.
Wenger chuan, “Kan tumber chu India rama talent inphum haichhuah niin, talent tha ber berte chu zaikhata luankhawmtir a ni leh a; thiamna nei kan hmuhchhuahte chu coaching programme tha tak pein, zirna pangngai tha tak kan pe bawk ang a, coaching leh education kalpui chungin competition level tha takah kan hruai reng dawn a, player ropuiah kan chherchhuak dawn a ni,” a ti.
All India Football Federation leh Odisha sawrkarin inremna thuthlung (MoU) an ziah lai hmuhpuitu Wenger chuan India leilunga an hmachhawp lian tak chu talent haichhuah a nih thu leh chutiang mite chu a tha thei ang bera chherchhuah a nih thu a sawi.
FIFA leh AIFF thawkdunin India leilunga academy an din takah hian under-14 player 50 an senglut dawn a, chu’ng zingah chuan Odisha state bik atangin naupang 15 an thlang dawn a; academy-a lut tur first batch hi FIFA coach-te thlan tur niin, kum hnih chhung academy-ah hian an training dawn a ni.
Odisha sawrkar chuan player-te chenna, ei leh in leh an lehkha zirna (boarding, lodging, acco-mmodation & education) an buai-pui dawn a, FIFA lamin coach leh zirtirna (technical know-how & coaches) an tum ve thung ang. Chumi tur chuan Wenger hmuh lai ngeiin AIFF leh Odisha sawrkar chuan inremna an ziak ta a ni.
FIFA hian India rama an project kalpui viltu lawkber (project director) atan China rama football hmasawnna lam lo buaipui tawh Spaniard Sergi Amezcua an hual fel tawh a, kum hnih chhung academy head coach hna a chelh ang a, thla engemawti chhung Indian coach-in a puibawm bawk ang.
FIFA-AIFF academy-ah hian foreign assistant coach pakhat dang pawh thla nga chhung atan rawih a ni dawn bawk a ni.
Wenger chuan a maka maka tam mihring chenna ramah hian talent haichhuah tur a tam thu sawiin, khawvela top nih theihna chance min hmuhpui tih a sawi a, chu chu Indian football nen thawkduna an tumber a nih thu leh a hlawhtlinna an hmuh hun tur erawh amah ngei pawhin a hriat bik loh thu a sawi.
“Thil chiang tak erawh chu zirna kan pek loh chuan tuna kan thutna ngaiah hian kan thu zui reng dawn a, zirtirna quality tha tak nen chuan player ropui kan chherchhuak thei dawn a, tah chuan khawvel football map-a ram ropui ber berte zingah India hi kan rinlut thei ang,” a ti.
Coach ngaihsan hlawh hian chu hmun thleng thei tur chuan player naupang lam zel thlanchhuah a tul thu thu sawi chungin, “India hian zirna (education) lamah sum a seng nasa a, chutiang chiah chuan hna dangah pawh kan tih ve a ngai a; vanduaithlaktakin, football-ah hian bul kan tan tlai tlat a, kum 15 vel atanga football khelh tan chauh chu a rem lo a, kum nga kum ruk vel atanga tan ngei ngei tur zawk a ni,” tiin bul tan hun dik a sawichhuak tel.
Wenger hian Odisha hmuna FIFA thawhpui academy hmunhma endik nghalin, he hmun hi a tirah chuan Odisha state football academy tura duan a ni a, hmanrua leh bungraw tha ber ber (top-class facilities) nena thuam a ni.
Chumi chungchang chu Gu-nners boss hlui hian sawi-chhuakin, a hmunhma, building leh bungruate chu ropui a tih thu leh FIFA atanga kum engemawzat chhung coach leh develop system-a an vur tur thu sawi chungin an tinzawn ber chu he academy-a insawrbing rih phawt a nih thu a sawi.
Wenger leh a team-te hian academy hi an en uluk hle a, dormitory hrang hrang, dining area, study room, coach room leh common area-te an fangkual a ni.
AIFF president Kalyan Chaubey chuan tuna an academy naupangte an chhawr theih hunah chuan a thlengtu nihna mai ni loa thiamna hmang ngata FIFA U-17 World Cup an khelh theih tur thu a sawi ve bawk. A thlengtu nihna hmangin 2017 FIFA U-17 World Cup kha India chuan a lo khel ve tawh a ni.