WhatsApp hmanga inbumna hluar

Police te chuan chung mite chu criminal group ho niin dik lo takin euros maktaduai tel midang te an laksak tawh tiin an sawi a.
Heng mi an man te hi inbumna, pawisa chheprelh leh criminal organisation tih thubuai te siamsak an ni tiin El Pais chanchinbu chuan a tarlang a.
Spain national police forces Guardia Civil te chuan heng WhatsApp hmanga sum laksakte chu Euros 800 atanga 55,000 thleng te pawhin a nih thu an sawi a.
Alicante province ah ringawt pawh mi sum laksak 238 an awm tiin El Pais chuan a tarlang bawk a. Alicante mai bakah Barcelona, Girona, Madrid, Malaga leh Valencia ah te a nasa zual tiin an sawi bawk.
Spain national force tho policia Nacional te chuan January thla daih tawh khan criminal gang pakhat member 59 e chu ‘in fapa in buaina a tawk’ tia tawktar leh chhuanlam hmangin 450,000 euros chhuhsak avangin an man thu an lo sawi tawh a.
He inbumna hi mawlmang tea kalpui niin bumtu chuan an bum duha te chu number danga biain emergency thil a ni a, pawisa thawn nghal a ngai tiin an be zui ta thin a ni.
Chhuanlam an siamah an phone an tibo emaw tichhiaa an bank account an lut thei lo va tihte chu hman tlanglawn niin tarlan a ni bawk a.
Hei bakah hian scammer te chuan two-factor authentication code pek hmang te in inbumna an kalpui bawk a. An contact anga inchhalin tihpalh thilah an phone ah code an thawn palh tiin an sum ruksak nan an hamng zui ta thin a. Code an thawn veleh a thawntu account an hriat veleh chumi hmang chuan an chhungte leh thiante chu sum an dil ta thin a ni.
UK-ah pawh hetianga inbumna hi tun hnaiah a hluar hle a. UK-a Action Fraud te chaun WhatsApp hmangin criminal ten an chhungte anga inchhala sum an dilna report 1,235 lai an dawn tawh thu an sawi bawk a, chung atanga sum hloh chu 1.5 million pound a chuang an ti bawk.
Mahse United Kingdom a inbumna leh Spain a inbumna in inzawmna a neih leh neih loh erawh finfiah a ni lo.