Heavy rock band Whitesnake guitarist Bernie Marsden, kum 72, chu Ningani kalta khan a thi tih an puang. Marsden-a chhungte chuan a Instagram page-ah, “A chhungte aiawhinBernie Marsden thi thu lungchhiatthlak tak hi puan a ngai ta. Bernie chuan Ningani tlai lam khan thlamuang takin min kalsan ta am a nupui Fran, a fanu te Charlotte leh Olivia te an dawm hlum a ni. Bernie hian a rimawi ngainatna a thlah ngai lo a, a hun tawp thlengin hlaphuah leh rimawi thar record a chawlhsan lo,” an ti.
Bernie hi Whitesnake-ah hian 1978 atanga 1982 thleng a perform thin a, original band lineup-ah telin frontman David Cloverdale, bassist Neil Murray, guitarist Mick Moody leh drummer Dave Dowie te nen an tiho dal dal thin. Group ang chuan Marsden hi an band hla hit ‘Here I Go Again’ phuahtu zingah a tel a, a bandmate te nen 1987 khan he hla hi an record nawn leh nghe nghe a ni. He hla hian Billboard Hot 100 (singles) chart-ah October 1987 khan No.1 niin, kar 28 chhung chart-ah a lang thei a ni. Marsden hi an band hla hit dang ‘Fool for Your Loving’ phuahtu zingah a tel bawk a ni.
Whitesnake-a kum li chauh a tel chhung hian Marsden hian an band album hmasa panga- Trouble (1978), Lovehunter (1979), Ready an’ Willing (1980), Come an’ Get It (1981) leh Saints & Sinners (1982) te a khawrpum pui hman a, Whitesnake pawn lamah Marsden hian band hrang hrang a pui tawh bawk a, chung zingah chuan Moody Marsden leh Alaska te pawh a tel a, solo album a tichhuak nual a, a kutchhuak hnuhnung ber chu nikum August-a a tlangzarh ‘Trios’ kha a ni ta a ni.
Whitesnake guitarist Bernie Marsden a thi
