World Health Organization (WHO) chuan Pathianni khan Middle East-a buaina chhuak mek karah Lebanon, Iraq leh Syria-a hriselna lama hmalakna pui turin an Contingency Fund for Emergencies (CFE) atangin $ maktaduai 2 an pe chhuak tih a sawi.
Buaina hian mihring insuan kualna nasa tak a thlen tih WHO hian kar hmasa khan a sawi a, Iran-ah ringawt pawh mi 1,00,000 chuangin an insawn tawh niin a chhut a. Lebanon-ah mi 7,00,000 vel chu ram chhunga hmun him zawnga insawn an awm tawh niin a chhut bawk.
Lebanon-ah hian Public Health Emergency Operations Centre kaltlangin WHO-in hmanhmawh taka thawhhona tihchakna tur te, trauma care tihpunna tur te, natna enkawlna tihchakna tur te, damdawi pawimawh leh damdawi lam thil mamawh lei leh sem chhuahna tur atan $ maktaduai 1 dah a ni tawh tih agency chuan thuchhuah siamin a tar lang.
Iraq leh Syria chu rikruma thawhhona tihchak nan leh thil leh hliam buaipuinaa hman turin $ 5,00,000 ve ve pek an ni a. Damdawi leh bungraw pawimawh lei leh sem, tlanchhiate tana hriselna lama an mamawh pek leh natna enkawlna leh khawtlang hruaitute tihchakna tur ruahmanna siam a ni bawk tih an sawi.
WHO Regional Director for the Eastern Mediterranean Hanan Balkhy chuan, “Damdawia hmalaknaten harsatna lian tak an tawh mek lai hian indona hmuna damdawia thawkte chhawmdawlna tur leh a pawimawh zual bik laia hna kalpui reng nan tanpuina pek a pawimawh hle a ni,” a ti.
WHO-in Middle East-a hmalakna tur $ mtd 2 pe chhuak
