Grass-court grand slam title panga la tawh Venus Williams chuan grand slam title pasarih a lak tawh belhchhah thei turin kumin Wimbledon hi a khel leh thei dawn a, a ranking atangin phu lo mah se wild-card entry pek a ni.
Nilaini khan Wimbledon organiser-te’n he thu hi puangin, American mihang veteran bakah world number three lo ni ve tawh Ukrainian Elina Svitolina pawh wildcard pek a nih thu an puang.
Tarlan tawh angin, kum 43 mi lai ni ve tawh Williams hi kum khat chhunga major tournament pathumnaah hian tum nga a champion tling tawh a; uaithlak lamah hliamin tibuaiin, thla nga zet a chawlh hnuah tunthla hian khelmual a lut leh thei tan chauh a, thlathar tira khelh tan tur London khaw tournament lianah a inlan leh dawn a ni.
Wimbledon inbuatsaihna Birmingham Classic lama inlan mek Williams hi WTA ranking-ah 697-na ni mekin, Thawh-tanni daih tawh khan round of 32-ah Italian Camile Giorgi a rawn hneh chho leh nawlh a, kum li dawn hnua top-50 player a hneh leh vawikhatna chiah a ni nghe nghe.
Wildcard entry hmu ve dang Ukrainian Svitolina chuan nau a hrin hnuah khelmual lut lehin, French Open quarter-final a thleng a, tunkar hian Birmingham grass-ah kirin, Czech teenager Linda Fruhvirtova lakah a tlawm.
British number one Katie Boulter pawh wildcard pek zingah telin, karliamta khan Nottingham Open-ah a career-a Women’s Tennis Association title a sualchhuak.
Boulter bakah a chipui dang Jodie Burrage, Harriet Dart, Katie Swan leh Heather Watson-te pawh hmeichhe lama wildcard entry hmu zingah an tel.
Mipa lamah Wimbledon khel tur hian Liam Broady, Jan Choinski, Arthur Fery, David Goffin, George Loffhagen leh Ryan Peniston-te’n wildcard entry an hmu ve bawk a; mipa leh hmeichhe pahnih ve ve wildcard la pek leh turte hming erawh puan a la ni lo.
Wildcard hmanga Wimbledon khel tur zingah Venus tel
