Boxing palian huanga boxer tha ber Oleksandr Usyk chuan a kawnghren chuhpuitu atan Deontay Wilder a thlang . Palian huanga boxer lar Wilder nen inhmchhawn a duh thu a sawi. Usyk thusawi hian Wilder lamte beng a verh nghal viau bawk.
Ukranian boxer huaisen Oleksandr Usyk hi hmachhawn tura an tih apiang a hmachhawn mai thin a, boxer lar tak tak leh amah aia lian zawk fete pawh nise a hneh leh mai thin. Palian huangah kawnghren pali kawl khawm thei an awm theih loh reng hnuin ani hi chuan kawnghren pali hi tum hnih ngawt a kawl khawm tawh a, hei hian palian huanga boxer tha ber a nihzia a tilang chiang hle. Tunge a hmaah ding leh ang tih hi boxing ngaihventute ngaiven a ni mek.
Usyk hian Tyson Fury a hneh nawn hnuin July thla khan Daniel Dubois chu a vawi hnihna a hneh a, vawi hnih nan vek undisputed heavyweight champion a ni. Hemi hnu hian WBO kawnghren chuhpui turin Fabio Wardley chhawpsak a ni a. Wardley hmachhawn ai chuan a kawnghren kalsan a thlang a, WBO champion kawnghren kalsan fel. Wardley a hmachhawn tak loh vang hian tunge a hmachhawn leh ang tih a chiang lo reng. Vawi hnih a hneh tawh Tyson Fury nen nen a vawi thum nan inhnek tir leh tumna a awm a. Fury ngei pawh hian Usyk hmachhawn nawn leh a hreh lo. Fury nen chotuah an nih laiin Usyk hian Wilder hmachhawn a duh thu a sawi ta zawk.
Palian huanga tlawm la nei lo Usyk chuan, “Kum tharah hian inhnek chhunzawm leh ngei ka tum a, Deontay Wilder hmachhawn ka duh a ni. Ani hi boxer tha leh lar tak mai a ni a, inhmachhawn ta ila inhnek ngaihven hlawh leh hmuhnawm tak a nih ka ring”, tiin Boxing King Media a hrilh a. Wilder chu kum 10 chhunga boxer tha ler lar ber zinga mi a ni a, a team te nen ngun taka an ngaihtuah hnua thlang an nih thu a sawi el bawk.
Deontay Wilder hi boxer lar, WBC champion hlui a ni a, hnekna zet mai a ni. Tyson Fury a hneh loh zawn vangin a boruak a hniam a, Joseph Parker leh Zhilei Zhang te laka a tlawm zawn leh vangin a boruak a hniam leh zual a, boxing a chawlhsan rinna lian tak a awm hman. Hun harsa tak a tawh hnuin June thla khan a khingpui Tyrrell Anthony Herndon chu a hneh ta hram a, phur tharna a nei. |ha zawka kir leh tuma a inbuatsaih lai mekin thu lawmawm tak an dawng a, chu chu Usyk-an hmachhawn a duh tih hi a ni. Wilder tan chuan hei baka thu lawmawm a awm kher lo ang. Usyk tawngkam tha hi a bawhzui nghal chuk chukin a rinawm a. Kum tharah boxing palian huanga inhnek hmuhnawm tak en tur a awm a rinawm.
Wilder thlangtu Usyk
