Wimbledon-ah seed chang pha an hek!
Kumin All England Club-a grand slam tournament zet chu a bul tan ni atangin ‘upset’ kan han tih ang chi, chak zawk ngei ngei tura ngaih tlawm ta tlat hmuh tur an awm nghal tak tak a; Thawhlehniah pawh thleng sang tura rinkai an tla leh phawk phawk mai!
He thu buatsaih lai thleng hian men’s seed 13 zetin first round an paltlang zo lo tawh a, chu chu kum 2001-a 32 seeds an hman tan atangin Wimbledon bika mipa seed luah pha round hmasabera an tlak tam ber tum a ni.
Hmeichhe lamah pawh seeded player pakua ngawtin women’s first round an paltlang zo lo tawh a, singles draw pahnihah hian top 10 seed zinga pariat tla fel tawhin, chu chu professional era chin Grand Slam-a top 10 seed luah pha player-te’n round khatna an pelh zawh loh hnem ber tum a ni.
Hmeichhe singles lama tla langsar kan hmuh leh chu Paris trophy lian la zo hlim, French Open-Wimbledon double tuma London thlawklut American second seed Coco Gauff niin, Thawhlehni khan Ukraine nula Dayana Yastremska chuan American world number two hi 7-6(3), 6-1-in first round matah pakhatah a hnawtchhuak.
Tarlan tawh angin, Italy player hriat hlawh lo Elisabetta Cocciaretto pawhin hming hraw Jessica Pegula of the United States chu second round lut zo lo zawngin a lo dangbet tawh bawk a nih kha!
He thu buatsaih lai thleng hian women’s draw lamah top five seed atangin pathum an tla fel tawh a, pakhat dang chu number five Zheng Qinwen of China niin, Olympic champion hi Czech doubles specialist Katerina Siniakova chuan 7-5, 4-6, 6-1-in a barakhaih a, a zawna a tum thumna atan Wimbledon first-round a paltlang zo lo.
Hetih lai hian women’s defending champion Barbora Krejcikova pawhin kum 20 mi lek, hma lam hun nei eng tak Filipina Alexandra Eala lakah fiahna hautak fu a paltlang hram a, set hmasaber hloh zet chungin 3-6, 6-2, 6-1 hnehna nen nikuma rin loh taka a rawn champion nawlhna Centre Court-ah second round a lut.
Five-times Grand Slam champion Iga Swiatek pawh kumin All England Club-ah hian seeded eight ni chung daihin a inlan a, a chetfuh tak tak theih lohna grass tournament lian berah hian set hmasa zawkah harsatna tawk bawk mah se Polina Kudermetova lakah 7-5, 6-1 hnehna nen round khatna a paltlang phawt.
Russian tleirawl Mirra Andreeva pawhin 6-3, 6-3-a Mayar Sherif hnehin round two a lut ve bawk.
Wimbledon-ah seed chang pha an hek!
