Wimbledon hmeichhe singles inthlifim chho zel

Wimbledon hmeichhe singles inthlifim chho zel
Champion lai Barbora Krejcikova pawh third round paltlang zo loin American 10th seed Emma Navarro lakah Inrinni zan khan 2-6 6-3 6-4-in a tlawm a, inkhelh banah mittui nen a thahruaiin a tlin ngang lo tih a sawi!
Czech hi hliam avangin a inlan thei lo palh mai ang tih hlauhthawnna a neih hnua All England Club thleng thei hram niin, third round match-ah bul a tan tha zawk a, harsatna lian lutuk tawk loa set khatna a lak mai hnu set hnuhnung pahnihah a chau zui ta tlat a, a title kawl lai humhim tura a kal zel thei ta lo pawi a tih thu leh vanduaithlak a tih thu a sawi.
Krejcikova chuan, “A hmasaberah chuan, ka chaw ei ka mawhpuh a, ka inhnawhpuar hma lutuk kha ka tuar ta niin ka hria.
“Chuvangin, balhla leh thlum pai lam ka han hmawm hmawk hmawk kha a ni a, mahse, ka ziawm thei chuang tlat lo a, ka dinhmun kha a chhe zual zel a, thahrui ka nei ta lo a ni,” tiin a chak loh chhan a sawifiah.
Raducanu veltu Sabalenka
Top six women’s seeds zinga la dam awmchhun Aryna Sabalenka chuan women’s singles lama British innghahna derthawng ru tak Emma Raducanu chu third round inkhel dangah 7-6(6), 6-4-in a vaw tla a; kum 22-a upa Raducanu qualifier ni chunga US Open title a rawn lak nawlh hnu khan major title hi a hnaih pawh a hnaih pha ta lo a ni ber e!
Kumin Wimbledon-ah hian 2023 Wimbledon champion Marketa Vondrousova a rawn hneh chhoh avang khan Sabalenka lakah pawh rin a han kai deuh dawn a, mahse, Belarusian lakah set thum a khel zo lo.
Sabalenka hian tualchhung nula tan hlawhin auphurtu leh tantu a ngah pauh leh a intiphur chawp ve sauh sauh tih sawiin, “A boruak tak kha aw! Dik taka sawi chuan tun thlengin ka beng pawh tun thlengin a la na vek! A ring over a ni ber e.
“Amah lawm leh thlawpa in au apiang khan keimah leh keimah kha ka inauphur ve nghal zel a, kan boruak tawn avang khan ka lawm a ni,” tiin Belgium nula Elise Mertens hmachhawn leh tura a chak dan boruak a sawichhuak.
Keys barakhaihtu Siegemund
Wimbledon Championships third round match dangah United States player langsar Madison Keys chuan a hneh mai tura ngaih Germany player Laura Siegemund a hneh lo a, Wimbledon seed chang phate kalbona a tawp thei lo!
American sixth seed Keys hi 6-3, 6-3-in 104th-ranked German Laura chuan a barakhaih a, kumin kumtir lam Australian Open behchhana a Grand Slam title hmasaber a sualchhuah boruak nen chuan a danglam ta hle a, Court Two ni senra vawt vawt hnuaia unforced error tum 31 ngawt a neih kha a tuar a tih theih ang.
German Siegemund kha kum 37 mi ni tawhin, women’s singles draw-a la chambang zinga upa ber a ni tawh a, Wimbledon fourth round a thlen vawikhatnaah Argentine lucky loser Solana Sierra nen an intum leh dawn a ni.
Collins nawptu Swiatek
Inrinni inkhel dangah world number one hlui Iga Swiatek chuan kumin May thla Italian Open-a a ngam loh American nula Danielle Collins laka phuba lain 6-2, 6-3 hnehna nuamsa nen Wimbledon fourth round a lut.
Kum 24-a upa Swiatek hian grand slam title panga ngawt hawn tling tawh mah se London khaw tournament lian bikah hi chuan tunhma lamin quarter-final a la pel zo ngai lo a, kumin hian kum 31 mi ni tawh American hnehin last 16 a han thleng ve leh ta phawt a, vawiin fourth round inkhel pakhatah Dane seeded 23 Clara Tauson lakah fiahna dang a hmachhawn zui leh ang.
Osaka return party
titawptu Pavlyuchenkova
Kumin All England Club-a grass-court grand slam tournament zet chu seeded player nih loh a pawi loh tum tak a nih hmel a, Russian Anastasia Pavlyuchenkova pawh nau neih chawlh leh hliam neuh neuh thawhsana kir hnaivai Japanese Naomi Osaka lakah a chak a, set hmasaber hloh zet chungin 3-6, 6-4, 6-4 hnehna nen round lina a lut.
Major title a lak tawp atanga kum li dawn hnuah pawh Osaka hian 2021 Australian Open trophy bak major title a la hawn belh thei lo tluang ta zel.
‘Lucky loser’ tlawm duh lo!
Argentina player Solana Sierra chuan Wimbledon-a a vanneihna a palbaw chhunzawm zel a; third round match pakhatah Spain nula Cristina Bucsa laka 7-5, 1-6, 6-1 hnehna chang lehin fourth round a lut ta der mai!
Argentine hian Australian Talia Gibson laka qualifying final round match point hloha main draw thleng zo lo dinhmuna a din zet tawh hnuah Belgium player Greet Minnen inhnuhdawh avangin hmun a chang leh hram a; ti chuan, main draw lamah a chak chho zel a, kum 1968 daih tawha grasscourt Grand Slam hi professional-a hnuhluh a nih hnuah tling loa ngaih tawh lut chho leh ‘lucky loser’ an tih zinga fourth round thleng thei hmasaber a ni ta hial mai!
Kum 21 mi hian a match hmasa pahnihah Australian Olivia Gadecki leh tualchhung nula tantu ngah Katie Boulter a lo paltlang tawh a, round sang zawk a thleng zo tawh lo a nih pawhin tuna a thlen chin atang hian a lo berah pawh pound 240,000 pounds (USD 327,336) a hlawh pha hrim hrim tawh dawn!
Australian Open champion Madison Keys hnehtu Laura Siegemund lakah Argentine hian fiahna lian zawk a hmachhawn zui leh ang.
A hringnuna Kartal hnehna lian ber
Britain player Sonay Kartal chuan a vawikhatna atan Wimbledon fourth round a lut a, 6-4, 6-2-a French qualifier Diane Parry a hneh kha a zawna match kua a chak tlinna chiah niin, kum 23-a upa Briton hi a career-ah hliamin tibuai chho ve reng mah se a hringnuna hnehna lian ber changin All England Club-ah a dai ngai loh ram a thleng.
Karliamta Thawhtanni khan Kartal hian chak zawk tura vantlangin an ngaih vek 20th seed Jelena Ostapenko a barakhaih a; kha mi ni, Wimbledon khelh tan ni khan Britain tennis tan ni ropui niin, Open Era an tih huna British player pasarih ngawtin ni khata round sang zawk an luh vawikhatna niin, a tuk, Thawhlehniah pathum dangin first round an paltlang leh bawk.
Ni li a liam leh meuh chuan amah bakah Emma Raducanu leh Cameron Norrie-te chiah Briton dam an awm tawh a; US Open champion hlui Raducanu pawh chu World No. 1 Sabalenka lakah a tlawm ve leh tawh a ni.
Inkhel dang
US player Amanda Anisimova pawh Hungary nula Dalma Galfi lakah 6-3, 5-7, 6-3-in a chak a, American zinga last-16 lut hmasaber a ni.
Kumin Wimbledon-ah hian American hmeichhe panga laiin third round an lut a, 13th seed Anisimova hi chu’ng zinga pakhat chu niin, kum 23 mi hi kum 2022 khan he hmunah hian quarter-finalist a lo ni ve tawh a, 110th-ranked Galfi lakah set hnihna hloh mah se set thumnaah chuan harsatna lian a tawk zui lo.