Tunhma lama a la thlen phak ngai loh ram daiin tum hnih lai Grand Slam singles champion ni ve tawh Coco Gauff chuan Jessica Pegula laka 4-6 6-3 6-3 hnehna nen a vawi khatna atan Wimbledon semi-final a lut ve ta nge nge.
Tunhma lam All England Club-a fourth round la pel ngai lo American hi nikum khan first round-ah a tlawm a; kum 2024 Wimbledon third round a luh hnua grass court singles match bika chak ni hmu leh ngai ta reng reng lo seventh seed hian kumin chu engnge maw a hriat tehreng ni a chipui leh rinkai zawk ni bawk Pegula a rawn barakhaih nawlh a; kum 22 mi hi 2007 French Open-a last four lut Maria Sharapova hnu lama Grand Slam pali huama semi-final chuangkai thei hnuhnungber a ni zui nghal.
2023 US Open leh 2025 French Open champion Gauff hian zanin final luh inchuh match pakhat zawkah seeded 14th Naomi Osaka harhna chang chho mek dangtu Karolina Muchova lakah fiahna dang a hmachhawn leh dawn a ni.
Czech 10th seed Muchova hian Wimbledon quarter-final match dangah 7-6 (7-4) 6-4-in Japanese four-times Grand Slam champion Osaka a hneh a; kum 2019 leh 2021 khan he stage-ah hian a lo tlawm tawh a, kumin hian a thlen chin atangin hma a sawn dawn em kan thlir ang.
Kum 28 mi Osaka hian fourth round lamah top seed Aryna Sabalenka meuh a paltlang theih avangin beiseina pawh nei sang hman hle tura ngaih a ni a, Muchova a ngam zo ta lo a ni.
Kum 29 mi Muchova hian hian tunhma lamin Grand Slam title a la hlawhchhuak ve ngai lo a, kumin chu Wimbledon semi-final hian a chuankai ve takah chuan major trophy a hawn kumte pawh a ni mahna le!
Wimbledon semi-final thleng hmasaber Gauff
