Pathiannia khelh zawh tak hmeichhe football world cup kha mipui maktaduai hnih dawnin a hmunah an thlir a, Women’s World Cup khelh tawha entu ngah ber (record attendance) a ni.
Australia leh New Zealand inthlentawm hmeichhe football tournament lian ber khan a hmaa world cup entu ngah record ding lai kha 600,000 chuangin a khum.
Spain nulate champion-na kumin tournament kha kum li kaltaa game 52 khelh atangin match 64-a tihpun niin, kha kha entu tam chhan pakhat a ni ve pah bawk ang a, match tina entu zat chawhrual kha 30,911 niin, kum 2019 France ram world cup-a game tin entu chawhrual (21,756) aiin a sang fe a ni.
Fifa president Gianni Infan-tino chuan kumin tournament atan khan ticket hralhchhuah tur maktaduai 1.5 a target a, an khum hneh viau a ni.
Kumin kha a vawikuana niin, a tum khatna atan confederation paruk atangin team 32-in an khel a, Fifa chief women’s football officer Sarai Bareman chuan kawng tinrengin an beisei a pha tih a sawi.
July ni 20 atanga August ni 20 chhung khan Australia leh New Zealand ram khelmual 10-ah belh-khawmin entu mipui 1,978,274 an pungkhawm a, tunhma lama hmeichhe world cup entu tam ber kum 2015-a match 52 entu fans 1,353,506 chu kumin hian break a ni.
Kum 2019 edition entu kha supporter 1,131,312 an ni.
Pathianni final-a Spain leh England inkhel kha Stadium Australia chhungah mipui 75,784-in an thlir a, ticket awm zawng zawng hralhchhuah niin, sikhat faia chak Spain chu a vawikhatna’n an champion a nih kha…
New Zealand ram chhunga world cup match 29 entu fans 700,000 chuang an ni a; kumin world cup hmaa he ram chhunga football match khat entu tam ber chu kum 2017 men’s World Cup play-off match-a Peru an hmachhawn tuma supporter 37,034 pungkhawm kha an ni.
Eden Park, Auckland-a record ding reng kha hi kumin hmeichhe world cup-ah hian a let thum zetin an khum!
New Zealand khawpuia Wellington Regional Stadium-ah match kua khelh a ni.
Stadium Australia lamin match nga thlengin, heti zat game entu fans hi 378,920 an tling a, game tinah ticket awm zawng zawng hralh-chhuah fai vek zel a ni.
A pumpuia match 64 khelh zinga match 10-ah entu mipui 45,000 chuang an awm.
Spain captain leh World Cup hero ni zui ta Olga Carmona kha Pa-thianni FIFA Women’s World Cup final-a goal awmchhun khungtu niin, a career-a inkhel pawimawh ber a hmachhawn hma khan a pa chu an ram lamah a thi a, a chhungte leh thianthate’n final-a a insawrbing duhsakpuiin a pa thih thu hrilh rih loh an titlu a, pa a nei tawh lo tih hre loin England an hnehna goal awmchhun a thun tih Spanish media outlet Relevo chuan a tarlang!
Carmona hian minute 29-ah goal khungin, inkhelh banah a pain a kalsan tih hrilhhriat a ni ve chauh tih Spanish FA (RFEF) pawhin Pathianni khan an puang ve bawk.
Carmona nu leh a nutate chu World Cup group stage-a Carmona inkhel thlir turin New Zealand-ah an zin a, chumi hnuah Spain lama kirlehin, karliamta Inrinni khan final-a Real Madrid full-back tawi-awm turin Australia-ah an thlawklut leh a ni.
Kum 23 mi Carmona fa hi hun rei tak natna tuar tawh niin, karliamta Zirtawpni khan a thi ta nge nge niin Reuters chuan a tarlang a; invui nghal vut vut chi an nih loh avangin a nupui fanaute pawhin mitthi vawnthatnaa an pa mut hlanin Carmona inkhel an thlir a, chakna goal a thun hnuah Spain captain pawhin a pa kal tak nge nge thu a hre ve ta chauh a ni!
Carmona hian social media kaltlangin a pa sunna leh thlahna a tarchhuak a, “Zanin hian min thlir ve reng tih ka hria a, min chhuang hle tih pawh ka hria e. Thlamuang takin chawl ang che,” tiin a ziak a, champion medal a fawp lai thlalak a pholang tel bawk.
Spaniard hian sawi belhin, a pain a kalsan tih hre lo mah se inkhel tan hma khan star a nei tih a sawi a, thil dangdai hlawhchhuak tur khan a pain chakna a pe tih a sawi.
Women’s World Cup 2023 thlirletna
