World Athletes of the Year
Duplantis leh McLaughlin-Levrone
Pathianni khan Monaco khawpuiah World Athletics Awards sem niin, pole vault-a a ma world record siam tum li ngawt tunhnaia khum chho zat zat Sweden superstar Mondo Duplantis chu mipa lama World Athletes of the Year atan thlan niin, hmeichhe award dawngtu chu American 400 metres world champion Sydney McLaughlin-Levrone a ni thung.
Duplantis hian kumin September thla khan Tokyo khaw World Championships-a a gold medal kawl lai a humhim bakah pole vault inelna a hmachhawn hnuhnung tum 16-ah a chak fai vek!
Kum 26 mi hian athletics khawvela inelna lian dang Diamond League-ah pawh a zawn zatin tum nga ngawt pole vault title a humhim mek a ni!
Hmeichhe World Athletes of the Year McLaughlin-Levrone pawh hi a tlatna mualah chuan Duplantis ang tluk thawthanga hrang niin, kumina a chhuahna pui ber 400m flat leh 400m hurdles-ah kum hnih chhung tehreng hneh loh nei loin a leng mek!
Tokyo khawpuia gold medal awrh tura a hun hman 47.78 kha 400m bika rang ber dawttu (second-fastest 400m of all time) niin, kum 26 mi hi 400m flat leh 400m hurdles world title lakawp thei athlete hmasaber a ni.
Japan rama World Championships-ah khan US 4x400m gold medal winning relay team-ah a tel bawk.
World Athletes of the Year Duplantis leh McLaughlin-Levrone
