World Book Day pualin hun hmang

World Book Day pualin hun hmang
World Book Day pualin Mizo Zirlai Pawl chuan Thawhlehni khan hun an hmang.
He hun hmanpuitu Information & Public Relations minister Lalruatkima chuan hnam fing leh mifing apiangin lehkhabu hlut zia an hria a, thiamna thehdarhna’n lehkhabu a pawimawh a ni tih an hre zual zel thin a. Mizo tawng humhim leh tih hmasawn piahlamah Zohnahthlak hnam hrang hrang tawng tih hmasawnna’n lehkhabu chu hmanraw pawimawh tak a ni tih a sawi.
Kumin World Book Day thupui ‘Indeginous Language’ tihin a entir chu tualchhuak tawng humhalh leh tihhmasawn a ni tih sawiin, “Khawvelah hian tawng tam tak a ral a, a hmangtu an tlem vangte in emaw a hmangtute thuziakah an chak tawk loh vang a ni thei a. Chutiang chu vawiina thil thleng leh thil thleng reng thei a nih avangin Zofate pawh hian kan tawng kan vawnhim leh tih hmasawnnan lehkhabu tam zawk ziak zelin, lehkhabu chhiar uar zel ang u,” a ti.
Kan tawng aia hnamdang tawng kan hman nasat zawk chuan kan hnam a boral ngei dawn tih Lalruatkima hian a sawi a. Ziaktu kan nih theihloh pawhin chhiartu nih tum tura chahin, “Tawng a ral chuan hnam a ral thin a, Mizo tawng ziah dan dika ziah uar leh thuril leh thu belhchian dawl leh thudik awmna chu lehkhabu tha a ni tih hre thar ila, Zoram hi Zohnahthlakte chenna tur ram chhenfakawm a nih zel theihna’n lehkhabu chhiar uar kawngah tan la thar ang u,” a ti.
World Book Day pual a hun buatsaihah hian MAL Book of The Year 2022 dawngtu Dr Zohmangaihi chu lawmpuina hlan a ni a. Ziaktu C Lalnunchanga biangbiakna hun hman niin, zirlaiten an chhim.
World Book Day hi World Book and Copyright Day emaw International Day of The Book tia sawi a ni bawk a. UNESCO-in kum 1995 atangin April 23 hi World Book Day atan a lo buatsaih a ni. Mizoramah MZP hmalakna in kum 2022 khan he ni pualin hun hman tan a ni a, kumin a ni tak hi Pathianni a nih avangin Thawhlehni khan hman a ni.