World Cancer Day hmang
Chuap cancer vei an tam
February 3 kha World Cancer Day a ni a, khawvel hmun dang rualin Mizoramah pawh hman a ni. Cancer hluar zual zingah chuap cancer chu mipa leh hmeichhiaah vei an tam ve ve tih sawi a ni.
National Health Mission hnuaia programme pakhat, National Programme for Prevention & Control of Cancer, Diabetes, Cardiovascular Diseases & Stroke (NPCDCS) chuan cancer dona ni ‘World Cancer Day’ hi Aizawlah an hmang a. Health & Family Welfare principal director Dr Vanlalsawma’n a hmanpui.
Chhinchhiah danin, Mizoramah mipa lamah chaw kawng cancer, pumpui cancer leh chuap cancer vei an tam ber a. Hmeichhia ah hnute cancer, chhul hmawr cancer leh chuap cancer vei an tam ber a ni.
Mizoram State Cancer Institute (MSCI) director Dr Jeremy L Pautu sawi danin, Mizoramah cancer enkawlna, Cobalt Therapy chu 1998 February 4 khan neih a ni a; khawl thar mamawhna a san avangin TCCC khawl thar chu 2024 February 4 khan neih a ni. A ni tela cancer case thar a pun chhoh zel avangin MSCI thuam changtlun chhoh zel a ni tih a sawi a. Japan International Cooperation Agency (JICA) nen cheng vaibelchhe 732 sengin MSCI thuam a ni a, cancer enkawlna leh research neih kawngah a pui hle dawn tih a sawi a ni.
Kumin World Cancer Day thupui “United by Unique” hmangin MSCI gynecologist oncologist Dr Zirsangliana Chhangte chuan a zirtir a. Cancer natna laka kan tawnhriat theuh hi danglam mah se, hei hi pumkhata min siamtua kan hman thiam a pawimawh a, damlote chiaina laka thlamuan, tanpui an ngaihna laia chhawmdawl, damlote fuih phur chunga enkawlna pek pawimawhna a sawi a ni.
World Cancer Day hi khawvel pumah kum 2000 atang khan hman tan a ni a. Mizoramah chuan kum 2014 atanga hman a ni. MSCI tarlan danin, kum 2023 chhung khan Cancer Hospital Zemabawka cancer natna vei inziaklut thar mipa leh hmeichhe belhkhawmin 2100 an chuang a ni.
World Cancer Day hmang Chuap cancer vei an tam
