World Championship khel tur India team-ah Mizo pali zet an tel!

Taekwondo Poomsae inelnaah sang ber World Taekwondo Poomsae Championship chu November ni 30 atanga December ni 4, 2024 chhung hian Hongkong-ah nghah a ni dawn a, championship hmachhawn tur India team-ah Mizo pali ngawt an tel!
Tun November ni 28-a India chhuahsan tur India team-a Mizo player-te chu – Lalthlamuanpuia (Venghlui), H. Vanlalfela (Armed Veng South), Pansy Rampanzeli (Chaltlang) leh Ruthi Zainunsiami (Ramhlun Venglai)-te an ni.
World Championship hi inelna chi hnih – Regular Poomsae leh Freestyle Poomsae-a then a ni a, Mizo player-te hi Regular Poomsae-ah vek an khel dawn a ni.
Lalthlamuanpuia leh H.Vanlalfelate hi Senior Regular Poomsae Under 30 Team event-ah khel dun dawn a, Sikkim mi pakhat nen an pathumin an tangho ang.
H. Vanlalfela hi Freestyle Poomsae individual-ah gold medal laa India aiawh thei tho ni mah se Regular Team Poomsae lama inpumpek a thlang ta zawk a ni.
Pansy Rampanzeli ve thung hi Junior Individual Regular Poomsae-a khel tur a ni a; Ruthi Zainunsiami hi Senior Under 50 Regular Poomsae-ah a khel thung ang.
India team-a tel tur hian selection hrang hrang an paltlang a; National Championship-a an champion hnuin Champion of Champions (CoC) zone hrang hranga mite nen Nasik, Maharastra-ah CoC Final Round an khel leh a; hetah hian an category theuhah champion lehin camp tura koh an ni.
India camp-ah hian CoC silver medalist-te nen koh niin, an performance atangin India team tur hi an thlang fel ta a ni.
Hongkong-a World Taekwondo Poomsae Championship vawi 13-naah hian ram 77 atangin infiammi 2000 chuang an inel dawn a; intihsiak hi Cadet, Junior leh Senior Category hrang hrang Individual, Pair leh Team-ahte then a ni.
Inelna mit la tak mai Freestyle Poomsae intihsiak pawh huaihawt a ni bawk ang.
He championship tawp zan hian khawvela taekwondo infiammite chawimawina sang ber World Taekwondo 2024 Gala Award sem a ni dawn a, he hunah hian Player of the Year, Fair Play Award, Coach of the Year, Referee of the Year, National Federation of the Year leh National Team of the Year an thlang dawn a ni.
India aiawh tur Mizo player-te hian October thla atang khan India camp-ah ngawrh takin training an kalpui tan tawh a; an kal hmain Aizawlah a haw zeuh a, Thawhtanni khan MATA president hoin thlahna hun hman a ni a, vawiin hian Aizawl an chhuahsan ang.