March 15 khan khawvel hmun dang rualin Mizoramah World Consumer Rights Day hman a ni a. Consumer Affairs minister K Lalrinliana chuan consumer kan nih angin mipuite chu kan dikna chanvo leh hamthatna hrechiang a, ngaipawimawh turin a chah.
Aizawla World Consumer Rights Day hmannaah Food Civil Supplies & Consumer Affairs minister chuan consumer kan nih ang taka mipuiin kan dikna chanvo leh hamthatnate kan ngaipawimawh a tul tih sawiin, India sawrkarin consumer-te hamthatna ngaihtuahin kum 2019 khan Consumer Protection Act a siam a. Sumdawngte leh anmahni dawrtu mipui inkarah thawhhona tha a tul thu leh, mipuiin kan thil lei kawngah fimkhur lehzuala thil man zat (MRP), a siam ni leh thih ni, cash memo leh receipt lak thu ah tan lak thar a ngai tih a sawi a; sumdawngte pawhin diktak leh hlemhletna tel loa thil hralh a pawimawh tih a sawi.
Consumer-te harsatna sutkianna tur Consumer Redressal Commission a awm tih sawiin, Consumer Union pawh mipui harsatna sukiang tura tan la thar turin a chah a. Consumer-ten awlsam zawka lungawilohna an thlen theihna turin online application – eDaakhil chu kum 2022-a hawn ni tawh mah se, hmangtu an la tlem hle tih sawiin, uar zawka hmang turin mipui a sawm tih a sawi.
Mizoram sawrkar pawhin chak zawkin consumer-te dikna chanvo vawnghim turin hma a lak mek tih a sawi a. District Legal Metrology thuamchak zel niin, ‘Working Standard Lab’ awm lohna district-ah dahfel thuai a nih tur thu a sawi bawk.
World Consumer Rights Day-hi kum 1983 atang khan kumtin March 15-ah thupui thlanbik neia hman thin a ni a, kumin thupui atan ‘Empowering Consumers Through Clean Energy Transitions’ tih thlan a ni.
World Consumer Rights Day hmang Dikna chanvo hre turin mipui chah
