Fifa World Cup 2026 khelh zawh taka fans lamin Dream XI Team an thlanchhuahah tournament chhunga goal vawi khat chiah chhuah chunga Spain champion-puitu Unai Simon chuan goal-ah hmun chang loin Cape Verde goalkeeper Vozinha zawk a dingchang tlat!
Kum 40 tlin tawh hnua khawvel hriat rawn hlawh ve chauh Vozinha hian kumin World Cup khelh tan hma lawk khan Portuguese second-tier club Chaves chhuahsanin, Fifa tournament lian a khelh lai khan club vawn a nei lo a, chuti chungin World Cup-ah ropui takin a inlan a, World Cup khel atanga team khatah awmkhawm se tia fans lamin an it ber team-ah a hming a lang pha ta hial a ni!
Cape Verde goalkeeper Vozinha hian tournament chhung khan belhkhawmin match li lekah save vawi 18 zet a nei tling a; champion zui ta Spain laka tlawm lo awmchhun an nihna inkhelah khan tum sarih tehreng save nei tling bawkin, FIFA technical group lamin goalkeeper tha ber lawmman Golden Glove dawng tlaka an ngaih Spain number one Unai Simon meuh ai pawhin fans lamin Dream XI team-a tel turin Vozinha hi an vawrh chhuak ta zawk a ni.
Vozinha hian goalkeeper vote-ah 39.6 percent hui tlingin, World Cup debutants Cape Verde chu last 32 a luhpui hial a, tah chuan finalist ni zui ta Argentina pawh extra time an thlenpui ngat a nih kha!
Fan-voted Fifa World Cup Dream Team-ah hian quarter-final pawh pel zo lo Norway striker Erling Haaland chuan tlarhma lamah hmun chang bawkin, ani hian match nga khelhah goal sarih a khawl tling a; chu’ng zingah chuan round of 16 lama 2-1-a Brazil an hnehna goal hnih thunin, football ram ropui Brazil an hneh hnuah an ram chanchina a vawi khatna atan World Cup quarter-final a luhpui hial a ni.
Haaland hian forward vote-ah 27.5 percent hui phain, semi-final luh inchuh match pakhata England an hmachhawn tum erawh kha chuan Manchester City forward hi English-ho khan an hrechiang deuh tawh nge an dang tluan thei ta a ni!
He team-ah hian beisei ang ngeiin Kylian Mbappe, Lionel Messi leh Jude Bellingham-te’n hmun an chang ve bawk.
World Cup dream team chu:
Goalkeeper: Vozinha (Cape Verde)
Defenders: Pedro Porro (Spain), Lisandro Martinez (Argentina), Dayot Upamecano (France), Marc Cucurella (Spain)
Midfielders: Rodri (Spain), Michael Olise (France), Jude Bellingham (England)
Attackers: Lionel Messi (Argentina), Erling Haaland (Norway), Kylian Mbappe (France)