SIRD&PR Kolasib leh District Legal Services Authority Kolasib tangdun buatsaihin tum khatna atan ‘World Down Syndrome Day’ pualin Ningani khan hun hman a ni a. SIRD&PR principal ZR Thafala chu resource person niin, Kolasib DIPRO Hmingthanzuala chuan a telpui bawk.
Resource person chuan enkawlna hranpa leh mamawh bik nei, Down Syndrome neite leh an chhungte puala hun buatsaih a ni chu lawmawm a tih thu a sawi a. Down Syndrome avanga harsatna thuhmun tawk mek chhungkuate inkarah inpawhna leh a tul huna intanpui tawn kawngah hmasawnna a thlen ngei a beisei tih a sawi. Harsatna lian taka lang pawh a huhoa hmachhawn chuan hun hlimawm leh hriatreng tlakah a siam theih, tiin, Down Syndrome vanga harsatna nei chhungkuate chu tanrual a pawimawh tih a sawi.
Down Syndrome nei nau piang an awmin nu leh paten dawnsawn an thiam theih nan damdawi inah hemi kawnga thiamna nei, counsellor an awm a pawimawh tih a sawi a. Mamawh bik neia piang an nih angin, an chenpuite inpekna a pawimawh hle tih a sawi bawk.
Hun kaihruaitu Kolasib District chief judicial magistrate Cacy Malsawmtluangi Ralte sawi danin, World Down Syndrome Day hi 2012 atang hman tan a ni a. Kolasib district-ah chuan an hman vawi khatna a ni. India khua leh tui kan nih angin, chhan hrang hrang avangin kan danglam deuh a nih pawhin India danpui chuan kan himna tur leh kan hmasawnna turin dikna chanvo min pe theuh a ni, a ti
The Playstop, Play School & Daycare, Diakkawna special educator C Vanlalnunhlima chuan Down Syndrome naupang enkawl kawnga hriat tur pawimawh sawiin, anmahni danglamna theuh hriatpui leh dawhtheihna thui tak neih a tul tih a sawi.
Kolasib khaw chhunga Down Syndrome-te leh an chhungte an tel a, harsatna an tawh thin leh an hmachhawn dan an inhrilhtawn a ni.
World Down Syndrome Day
