World Games-ah Italian athlete a thi!

World Games-ah Italian athlete a thi!
Italian orienteer Mattia Debertolis chu karliamta Zirtawpni khan China ram Chengdu-a World Games inelna pakhat ‘orienteering’ a hmachhawn laiin nikhaw hre loin a tlu a, tunkar Thawhlehni khan a thi tih puan a ni.
He World Games an tiha an intisiakna pakhat ‘orienteering’ an tih hi competitive sport niin, tlang ram leh ramhnuai pilril la kal ngai lohna hmunah map leh compass en chunga intlansiakna a ni a; China rama World Games buatsaihtute chuan kum 29 mi Debertolis hi ram hnuaiah nikhaw hre loin an chhar a, enkawl a ni chungin ni li hnuah a nunna an chhan zo ta lo a ni.
World Games organiser-te chuan thuchhuah siamin, China ram chhunga medical institution tha berte zinga miin theihtawp chhuahin enkawl mah se an chhan zo ta lo a; International Orienteering Federation (IOF) president Tom Hollowell pawhin an infiammi thihna runthlak tak chu teh chuah theih rual loha lungchhiatthlak a nih thu a sawi ve bawk.
He thu buatsaih lai thleng hian Debertolis-a thih chhan dik tak hi hriat chhuah a la ni lo.
World Games hi Olympic Games ang thoin infiamna chi hrang hrang belhkhawm (multi-sport event ) hmanga kum li dana intihsiakna lian ni mah se Olympics-a tel lo sports thloankhawm hmanga inelna a ni.
Debertolis hi men’s middle-distance event final a tlan laiin temperature degree 30 chuang a nih laiin a tlu a; official result tarchhuahah Italian hi ‘tlan chhuak zo lo’ tia chhinchhiah athlte 12 zingah a tel ta a ni.
Tarlan tawh angin, orienteering hi outdoor sport niin, participant-te chu map hmanga chhinchhiahna awm lo checkpoint hrang hrang inkara kawng zawng chawpa intlansiakna a ni a; taksa fit a ngai a, map-reading hmanga inhaikuak ngai, harsatna tawntlang tur paltlang ngai (problem-solving) sport a ni.
Italian orienteer Mattia Debertolis hi 2022 World Cup final-a pangana dinhmun hauhtu Italian national team-ah pawh khan a lo tel ve tawh a, tawnhriat ngah tak niin, tuntuma nikhaw hre loa an chhar mai pawh hi tlankawng vanga a harsatna tawh ngawr ngawr ai mahin a taksa lam fel lo vang a nih rinna a lian rih.
Debertolis hi civil engineer niin, Stockholm khaw university pakhata PhD zirlai a nih avangin a thih lai pawh hian Sweden rama khawsa a ni.
World Games organiser-te chuan thuchhuah an siamah Debertolis chhungte chu theihtawpa tuamhlawm chhunzawm zel an tum thu leh a theih dan ang anga orienteering chhungkua (community) tanpui zel an tum thu an tarlang.