Ruihhloa inchiu thin zinga test neih tawh chinah, zaa 74 chuan Hepatitis an kai a; Hepatitis B leh C kaite hian an kai tih an inhriat thin loh avangin hriatchhuah hna thawh nasat a ngai tih heti lam buaipuitu SHALOM Society hotute chuan an sawi.
July 28 kha World Hepatitis Day a ni a, kuminah Pathiannia a tlak avangin Health & Family Welfare department leh pawl hrang hrang tangrual huaihawtin July 29 – Thawhtanni khan Aizawlah hman a ni a; kumin thupui chu “Its time for action” tih a ni,
Hepatitis laka invenna lam sawitu SHALOM Society CEO Dr Chawnglungmuana chuan, Hep B leh C kaite hi an inhriat thin loh avangin hriatchhuah hna thawh nasat a pawimawih a. Self testing neihnaah ruihhloa inchiu thin zingah zaa 74-in Hepatitis an lo kai tih hmuhchhuah a ni tih a sawi. Hetiang kawngah hian sawrkarin hma a lakpui an ngai hle tih sawiin, “Mizoramah tam zawka viral load kan test theih nan, hma min laksak turin sawrkar ka ngen a ni,” a ti.
Hmanpuitu Health minister Lalrinpuii chuan, mihring taksaa peng pawimawh tak, thin (liver) hian chhan hrang hrang vangin hepatitis telin, natna inkaichhawn theih kaiin harsatna a thlen thei tih a sawi a. Inkaichhawn theihna laka fimkhur a tul tih a sawi. “Mitinte kan nitin khawsak leh nunphungah midang laka fimkhur a, heng invenna leh kaihhruaina hi midang hnenah a tam thei ang ber hrilh a pawimawh,” a ti. Sawrkar damdawi inah a thlawna inenkawlna a awm tih a sawi bawk.
NVHCP state nodal officer Dr Doris Lalnunmawii Sailo chuan Hepatitis C chu kum 2030-ah umbo tum a ni tih a sawi a. Hepatitis natna tihreh dan leh a inkaichhawn dan hriatchian, chhungkua leh khawtlangah awareness pek a pawimawh tih a sawi a ni.
World Hepatitis Day hmang Drugs-a inchiu zaa 74-in kai
