World Taekwondo Championship khel tur
Rampanzeli leh Lalhumthanga
Khawvela Taekwondo inelna sang ber September ni 16 – 20, 2026 chhunga khelh tur World Taekwondo Poomsae Championship-ah Daniel Lalhumthanga leh Pansy Rampanzelite’n Senior Pair Under 30 category-ah India ai a awh dawn.
He inelna liana tel thei tur hian Daniela leh Pansy-te hian July 8-11, 2026 chhunga Pune, Maharashtra-a khelh zawh tak 5th India Taekwondo National Poomsae Championship-ah khan gold medal an la a, world championship khel tur hian thlan zui nghal an ni.
2025-26 Batch, NIS Diploma in Coach Grade ‘A’ laia pass hlim hlawl, Mualpui Salem veng tlangval Daniel Lalhumthanga hi Gidae Taekwondo Club, ITI chhuak niin, India tan 13th South Asian Games 2019-ah khan gold medal a la tawh a, 37th National Games 2023-ah leh 38th National Games 2025-ahte Mizoram tan gold a lo pet chhuak tawh bawk.
A kawppui tur Chaltlang nula Pansy Rampanzeli, Exodus School Taekwondo Club chhuak pawh hi ram tana lo khel nual tawh niin, Hongkong, China-a 2024 World Championship-ah khan India aiawha inlan tawhin, quarter-final stage-ah South Korea player hneh loin a vanduai hlauh kha a ni a; national leh international open-ah ram tan medal tam tak a lo la tawh bawk a ni.
Pansy leh Daniel-a tang dun hi national level-ah chuan tum hnih lai champion an lo ni tawh a; international level-ah chuan an tum khat inlan dunna tur a ni thung.
In buatsaihna an nei tha viau a, India aiawh tur zingah pawh medal la thei tura beisei ber zinga mi an ni.
Ni nga chhung awh tur Chuncheon 2026 World Poomsae Cham pionship hi a hlutnaah chuan Grade-8 niin, ram 79 atangin player 2636 zet an tel dawn a ni. India team hi Recognised leh freestyle Poomsae-a Cadet, Junior leh Senior category hrang hrangah individual, pair leh team-tein an khel dawn a; an vain mi 60 niin, tunkar Thawhlehni khan Chuncheon, South Korea an thleng a; Pansy-te thian dun hian September ni 20, 2026-ah an bout hmasaber an khel ang.
World Taekwondo Championship khel tur Rampanzeli leh Lalhumthanga
