Wrestling legend Hulk Hogan a thi
Ring chhunga an sawisak hrep hnuah, a chak lo zawkah a tang dawn emaw tih tawh hnuah, a rawn khûr ngut ngut a, nâ pawh hre tawh lo ang maiin a rawn bei let leh thin kha chu hmuhnawm kan ti thei teh e. Wrestling, WWF tia kan hriatlar thin, WWE ni ta a a hunlaia huhang nei lian ber, wrestling legend ropui berte zinga mi, keini ram atang pawha wrestling star kan hmelhriat hmasak leh tantu ngah ber pawl ni thin Hulk Hogan chu kum 71 mi niin, Clearwater, Florida-a a chennaah an rama July ni 24 zing khan a thi.
911 operator-in phone call a dawn hnuah emergency team-in Hogan chenna hi an pan nghal a, report an dawn dan chuan ‘cardiac arrest’ (lungphuchawl) lam rawngkai a nih hmel a. Hogan chu Mortan Plant Hospital panpui nghal a ni a, damdawi inah hian a thih thu an lo puang ta a ni.
Hulk Hogan, a hming tak Terry Gene Bollea hi WWE star ropui berte zinga mi niin, WWE champion pawh tum ruk a ni thei a, WWE Hall of Fame-ah lak luh niin, 1980s a khawvelin WWE a hmelhriat theih nana thawh hlawk tak a ni.
Hogan hian hnungzang nâ a nei a, kar liamta lawk khan a ngawng an zai bawk a, an zai hlawhtling viau niin an sawi. 2012 a wrestling a chawlhsan hnuah a hriselna lamah insawiselna neuh neuh a nei ve nual a, nikum September thlaa Jake Paul-a podcast-ah “Tun kum 10 chhung hian vawi 25 vel zet ka inzai (surgery) a. Vawi 10 chu ka hnungzang zai a ni a, khup ruh thlak sak ve ve ka ni a, ka kawng ruh an thlak bawk a, dar leh…engkim a ni mai e,” a ti.
Hogan hian wrestling hi 1977 atangin a luhchilh a, rawng eng leh sen bakah a signature leg drop move (an tumpuite tluk tawh hnuah an zuang kang a, mawng sawh deuh dawpa tla chungin an tumpuite awm/nghawng/lu/hmai velah an ke thluangin an tum thin) te a larpui hle a, a leg drop move hi a kawng leh khupin a tuar ta a, a inchhir thu te pawh a sawi chhuak fo nghe nghe a ni.
Hulk Hogan hian a nupui then tak, Linda Hogan nen fa pahnih- Brooke Hogan, kum 37, leh Nick Hogan, kum 34, an nei a. 2005 khan an chhungkua hian reality series ‘Hogan Knows Best’ an tichhuak a, a WWE khawvel leh an chhungkaw thil te an tilang thin. Mahse, 2007-ah Linda nen an inthen avangin an titawp leh ta a ni. 2023 khan Sky Daily nen an innei leh a, an nupa hian nikum khan Real American Beer an tlangzarh a, an sumdawnna pawh a kaltluang a, nikuma US President inthlan dawn khan Donald Trump a support a, Republic National Convention-ah pawh Trump atan campaign-in thu a sawi nghe nghe a ni.
Wrestling legend Hulk Hogan a thi
