Thu leh hla lama inhmangte intelkhawmna pawl pahnihin thuziak mite’n kut hah man dawng ve thin se tiin an rawt a, hei hian ngaih pawimawh a hlawh lo hle.
2023 July ni 27 khan Mizo Academy of Letters (MAL) leh Mizo Writers Association (MWA) te’n inthurualin thuziak mite kut hah man tur hi an duang a, kum khat dawn a ni tawh; an thil duan hian ngaih pawimawh a hlawh lo a, writer-te’n kut hah man an la dawng meuh lo.
“Theihtawp chu kan chhuah ve a, mahse ngaih pawimawh a hlawh lo hle. Kut hah man dawng tawh hi pahnih khat te chu an awm ang a, mahse a tam zawk hi chuan an la dawng lo,” MWA president R Lallianzuala chuan a ti.
MAL leh MWA te’n thu ziah mah (honorarium) an duan dan chuan, magazine/souvenir chhuah tur thu ziah manah Rs 1000, lehkhabua chhuah tur thu ziah manah Rs 1000, seminar paper tur ziah man Rs 2000, youtube-a chhiar tur ziah manah Rs 5000 te ni se tih a ni a, hetiang hian writer-te pek thin ni se an ti a ni. Mahse writer-te intelkhawmna pawl chuan an ngennain ngaih pawimawh a hlawh lo a, kut hah man dawng hi chu pahnih khat an awm ve ang an ti chauh.
“Ngenna a ni a, writer-te hamthatna turin kan han ti ve a ni a. Kan tlangau ve viau a, kan theih ang tawk chuan kan tlangau a, mahse ngaih pawimawh a hlawh lo,” MWA president chuan a ti.
Writer-te ngentu ber, thu ziak tura ngentu ber chu magazine siamte, jubilee puala souviner magazine siam te an nih a rinawm thu a sawi a, anni hnen atang hian writer-te’n thu ziah man an dawng meuh lo nia a sawi bakah, mi dang hnen atang pawhin an dawng meuh lo tih a sawi.
“Tun hma ang tho kha kan la ni. Kan writer hmasate’n lawmman emaw kut hah man emaw an dawng lo a. Thu ziak turin an ngen a, hmanhmawh turin an ngen a, an tur a ni ber a. Mahse kut hah man an dawng lo a, chutiang tho chu kan la ni,” tiin writer-te dinhmun a sawi.
“Thu ziah man chauh a ni lo a, complimentary copy pek nachang hre lo te kan ni a, writer-te hian an thuziak chuanna copy te an hmu lo hial thin a,” a ti bawk.
Theihtawp chhuaha an tlangau thu a sawi a, tlangau zel hi an tih theih chu a nih mai tih te sawiin, “La tlangau zel tur a ni mai a, a bak han tih theih vak a awm lo,” a ti.
Writer-te kut hah man chungchangin ngaih pawimawh hlawh lo
