WTA 1000 champion naupang ber
Mirra Andreeva
Inrinni Dubai Tennis Championships final-ah 7-6(1), 6-1-a Clara Tauson hnehin Russian tleirawl kum 17 leka upa Mirra Andreeva chu WTA 1000 title la thei naupang ber a ni.
Denmark nula kum 22 mi Tauson tum thei tura final a luhna kawngah Russian hian Grand Slam champion pathum – Marketa Vondrousova, Iga Swiatek leh Elena Rybakina-te a paltlang a, vawiina WTA ranking thar tarchhuahah a vawikhatna atan top 10 huang a luah ve ta nghe nghe.
Russian hian coach atan Wimbledon champion hlui Conchita Martinez a ruai a, mellung thar a phun hnu hian a hmachhawp tarlangin, top 10 dinhmun luah chunga kum tawp hman a duh tih a sawichhuak a, “Tunah February thla tawp chauh a la ni chungin tun hi ka thleng ta phawt a, ka tan chuan a awihawm loh hial zawk a ni.
“Vawiina ka khelh danah hian ka hlim takzet a, ka nervous hle bawk a, double fault leh tihsual dang ka neih pheng phung danah khan chu chu in hmu thiam ngei ang.
“”Pressure laka ka damkhawchhuah theih avang erawh chuan ka hlim a, ka hun tawn hi mak tihnain ka khat a, ka lo suangtuah thin zinga pakhat niin, tun dinhmunah chuan sawi ber tur pawh ka hre lo a ni ber e,” a ti.
Andreeva hi kum 1993-a he tournament khelh tan a nih hnu khan kum 2006 champion Rafa Nadal tih lohah chuan mipa leh hmeichhia sawi loa tleirawl/rawlthar (teenager) champion leh thei hmasa ber a ni.
WTA 1000 champion naupang ber Mirra Andreeva
