WTA Finals an tan ta…
Hmeichhe tennis season kharna inkhel WTA Finals chu Inrinni khan Saudi Arabia khawpui Riyadh-ah khelh tan niin, 2022 WTA Finals-a Caroline Garcia ngam loa pahnihna dinhmun luahtu Aryna Sabalenka chuan nuamsa takin bul a tan a, Chinese seventh seed Zheng Qinwen lakah 6-3 6-4 hnehna a chang.
World number one thar Sabalenka hian season-ending WTA Finals bul a tannaa a sawisak Zheng-i hi tunhma lam pawhin a lo hneh tawh thin a, kumina vawili ngawt a hneh bakah kum hmasa lam khan vawikhat a lo hneh tawh bawk a, Chinese fans phei chuan Belarusian hi an chipui nu tan hminglem an phuahsak a, ‘Zheng-i tana lawnchhuah hmabak tlang’ an ti hial a ni!
Kumin January thla Australian Open final-ah khan Sabalenka hneh loin Zheng a tlawm a; kumin September thla US Open final-ah tualchhung nula Jessica Pegula hnehin Belarusian khan a career-a a Grand Slam singles title pathumna a sualchhuak.
Major title pathum lai hawn ve tawh mah se Sabalenka hian WTA Finals title a la sualchhuak ve ngai lo a, Inrinni liamta khan he title hi lak ngei tuma duhthu a lo sam khum thin zinga pakhat a nih thu a sawi nghe nghe.
October thlaa Iga Swiatek hmakhalha world number one a rawn luah chhoh leh hnuah Sabalenka hi kumin title la tura rinkai ber a ni mek a; thla hmasa maia Wuhan Open final-a Zheng bawk a hneh hnuah Belarusian hian kuminah title pali a la tling tawh a ni.
Sabalenka lakah duap leh thin bawk mah se Zheng-i tan pawh kumin hi kum tha a ni ve tho a, July thla mai khan Paris khawpuiah Olympic gold medal a awrh a, he Belarusian nula teivet avang hian a ropui tur angin a ropui chhuak zo rih lo mai zawk a ni!
Inrinnia Purple Group inkhel dangah Jasmine Paolini pawhin 7-6 (7-5) 6-4-in Elena Rybakina a hneh ve bawk.
Italian Paolini hian February thla khan Dubai khawpuiah WTA 1,000 title lain, Grand Slam pahnih French Open leh Wimbledon-ah a zawn zatin final a khel zui leh a, a career-a a vawikhatna atan season kharnaah inlanin, tah pawh chuan Kazakh Rybakina lakah bul a tan fuh leh ta phawt a ni.
Paolini hian Olympic-a Italy tana gold medal a lakpui Sara Errani nen inkawpin Saudi Arabia ramah hian doubles inelna a hmachhawn tel dawn.
Human rights record an neihchhiat avangin sawisel hlawh hle mah se sum an neih miau avangin kumin hian a vawikhatna atan Saudi Arabia ramah WTA Finals nghah a ni a; tuialhthei avanga hausa ramin a thleng a ni bawk a, he tournament awm tawha prize money san ber tum niin, lawmman an semchhuah tur hi belhkhawmin US dollar maktaduai 15.25 zet a tling a, singles champion hian pound maktaduai 4 vel an humhaw tling dawn a ni!
November ni 2-9, 2024 chhung awh tur WTA Finals khelh mek hi season tawp lam singles leh doubles ranking-a a sang pariatte inelna niin, kumin hian singles bikah world No. 1 Aryna Sabalenka, Iga Swiatek, Zheng Qinwen, Elena Rybakina, Jessica Pegula, Coco Gauff, Barbora Krejcikova leh Jasmine Paolini an inlan.
Purple Group-ah Sabalenka, Zheng, Rybakina leh Paolini-te awmin, Orange Group lama awmte chu – Swiatek, Gauff, Pegula leh Krejcikova-te an ni.
WTA Finals an tan ta…
