WTA Finals hnehtu Gauff

WTA Finals hnehtu Gauff
Zirtawpni zan semi-final match pakhat zawka world number one Aryna Sabalenka a paltlang hma group match lama Polish world number two leh champion lai ni bawk Iga Swiatek meuh pawh lo hneh ngat tawh American Coco Gauff chuan chuan Inrinni khan women’s singles final-ah kumin Paris Olympic Games-a China tana gold medal awrhtu Qinwen Zheng hneh lehin a career-a a hmasaber ni turin hmeichhe tennis season kharna WTA Finals trophy a hlawhchhuak ve ta nge nge.
Saudi Arabia khawpui Riyadh-a King Saud University Indoor Arena inkhelah kum 20 leka upa Gauff hian darkar thum leh minute li chhungin Chinese seventh seed lakah 3-6 6-4 7-6(2) hnehna a chang a, kum 20 chuang kaltaa sawi lo hlawh hat tawh Maria Sharapova hnu lama season-ending WTA Finals champion ni thei naupangber niin, kum 2001-a record siamtu Serena Williams hnu lama American champion leh thei naupangber a ni nghal bawk.
Saudi Arabia rama professional women’s tennis tournament hmasaber hmangin Gauff hi US dollar maktaduai 4.8 (£3.7m) ngawtin a hausak belh leh ta a ni!
Singles champion lawmman sum fai dawn hi women’s professional tennis-a lawmman tam ber record thar a ni nghe nghe.
Third seed Gauff hian Auckland hnehna chang chungin kum bul a tan fuh chat a; Australian Open lamah semi-final lut zui leh mah se Wimbledon-ah fourth-round a paltlang zo lo a, Paris Games-ah ni se third-round piahlam a thleng pha lo a; Toronto leh Cincinnati lama a thlensan zawh loh hnuah US Open title lak nawn leh tumin New York tournament lian khel zui leh ngual mah se fourth-round match-ah Emma Navarro ngam loin a tlawm zui leh.
A chetfuh hleih theih tak loh avangin Gauff hian a coach chhawr lai Brad Gilbert a ban ta hial a; tlemin a rawn kang chho leh a, thla hmasa mai khan China Open-ah a WTA 1000 title pahnihna hlawhchhuak tain, he mi hnu hian Wuhan Open semi a lut zui leh bawk.
Season kharna tournament khel turin Riyadh khua a pan a, rin loh tak maiin champion tura rinkai pahnih Swiatek leh Sabalenka hnehin championship match a khel a, a trophy khawlbawma hmuh tur la awm ngai lo title a hlawhchhuak zui ta hial a ni.
Inrinni vek khan second seeds Erin Routliffe leh Gabriela Dabrowski inkawpin doubles title an la ve bawk.
New Zealand-Canadian pair hian American Taylor Townsend leh Katerina Siniakova of the Czech Republic inkawp lakah 7-5 6-3 hnehna changin, kumin Wimbledon finala an tlawmna phuba an la.